غزہ (روشن پاکستان نیوز) اسرائیل اور فلسطینی مزاحمتی تحریک حماس کے درمیان جنگ بندی معاہدے کے تحت قیدیوں کے تبادلے کا دوسرا مرحلہ مکمل ہوگیا۔
عرب خبر رساں ادارے کے مطابق اسرائیلی حکام کا کہنا ہے کہ غزہ جنگ بندی معاہدے کے تحت اسرائیلی جیلوں میں قید 200 فلسطینیوں جبکہ حماس کی جانب سے غزہ میں قید مزید 4 اسرائیلی خواتین فوجیوں کو رہا کردیا گیا ہے۔
اسرائیلی جیل سے رہا ہونے والے فلسطینی قیدی ریڈ کراس کی بسوں میں راملہ پہنچے جہاں انکا والہانہ استقبال کیا گیا اور عوام نے انہیں کندھوں پر اٹھا کر بھرپور جشن منایا جبکہ اس موقع پر والدین کی بچوں کو دیکھ کر آنکھیں نم ہوگئیں۔
3 بسوں میں 130 فلسطینی قیدی سوار تھے جبکہ اسرائیل 70 قیدیوں کو ملک بدر کرکے مصر بھیج دے گا۔
رہا ہونے والوں میں 121 فلسطینی عمر قید کی سزا کاٹ رہے تھے۔
دوسری جانب غزہ میں قید مزید 4 اسرائیلی خواتین فوجیوں کو رہا کردیا گیا ہے اور القسام بریگیڈ نے فوجی یونیفارم میں اسرائیلی قیدیوں کو ریڈ کراس کے حوالے کیا جنہیں ہیلی کاپٹر میں تل ابیب منتقل کیا گیا۔
مزید پڑھیں: “جنوبی غزہ میں اسرائیلی ٹینک کے حملے میں 2 فلسطینی شہید”
قطر کی وزارت خارجہ کے ترجمان کا کہنا ہے کہ جنگ بندی معاہدے کے تحت قیدیوں کے تبادلے کا دوسرا مرحلہ مکمل ہو گیا ہے۔
