لندن(صبیح زونیر)برطانوی وزیر اعظم رشی سونک نے لندن میں مہم سے قبل معروف صحافی کو باہر پھینکوا دیا ہے، واقعے کی ویڈیو نے سوشل میڈیا پر طوفان برپا کر دیا ہے۔

لندن میں وزیر اعظم رشی سونک نے ایکس سیل سینٹر میں مہم ریلی میں شرکت کرنا تھی، جبکہ یہ مہم ٹی وی پر بھی براہ راست نشرہوناتھی۔

تاہم برطانوی ٹی وی  کے صحافی ڈیرن مک کیفرے کو سیکیورٹی پر مامور اہلکاروں کی جانب سے دھکا دیتے ہوئے تقریب سے باہر نکال دیا گیا ۔

ویڈیو میں دیکھا جا سکتا ہے کہ کوریڈور میں انتظار کرتے صحافی اور ان کے کیمرہ کریو کو سیکیورٹی اہلکاروں نے زبردستی باہر نکالا، جبکہ صحافی اور ان کی ٹیم کا سامان اندر روم میں ہی موجود تھا جہاں تقریب ہونے والی تھی۔

واقعے کے دوران صحافی مک کیفرے اطمینان بخش دکھائی دئیے، جبکہ صحافی کا الزام عائد کرتے ہوئے کہنا تھا کہ مجھے زبردستی ہٹایا گیا ہے، ہم صرف  انٹرویو لینا چاہتے تھے، مگر بدقسمتی سے ہمیں یہ کہا گیا کہ تقریب کے مقام پر پول ارینجمنٹس ہیں جس کے باعث ہمیں اجازت نہیں دی گئی۔

ہم مہم کی تقریب ریکارڈ کرنے آئے تھے، جہاں وزیر اعظم کا ا گلے چند لمحوں میں ہمارے ساتھ انٹرویو متوقع تھا۔

واضح رہے اسی تقریب کے دوران وزیر اعظم رشی سونک نے قبل از وقت انتخابات کرانے کا اعلان کیا ہے جو کہ 4 جولائی کو ہونے جا رہے ہیں۔