نیویارک(روشن پاکستان نیوز)ایسوسی ایشن آف الیکڑانک میڈیا ایڈیٹرز اینڈ نیوز ڈائریکٹرز (ایمنڈ ) نے حکومت پنجاب کی جانب سے تیار کیے گئے ہتک عزت کے مجوزہ بل اور وفاقی حکومت کے پیکا ترمیمی بل کو مسترد کرتے ہوئے کہا کہ اسٹیک ہولڈرز کو اعتماد میں لیے بغیر عجلت میں منظور کیا گیا کوئی بھی قانون آزادی اظہار رائے کا گلا گھونٹنے کے مترادف ہوگا۔
لاہور میں ایمنڈ کی جنرل باڈی کا اجلاس ہوا جس میں ملک میں آزادی صحافت کی موجودہ صورتحال اور الیکٹرانک میڈیا کو درپیش مسائل کا جائزہ لیا گیا۔
اجلاس میں کہا گیا کہ ایمنڈ ہتک عزت اور فیک نیوز کے تدارک کے لیے قانون سازی کی مخالف نہیں تاہم کوئی بھی قانون بنانے سے پہلے ناصرف اسٹیک ہولڈرز کو اعتماد میں لیا جائے بلکہ اس بات کو یقینی بنایا جائے کہ ایسا کوئی قانون آزادی اظہار رائے کو متاثر نہ کرے۔
جنرل باڈی اجلاس میں سال 2024 سے 2026 کےلیے عہدیداران کا انتخاب کیا گیا جس کے مطابق جیو نیوز کے اظہر عباس صدر، سما نیوز کے طارق محمود سیکریٹری جنرل، ایکسپریس نیوز کے ایاز خان سینئر نائب صدر، نیو نیوز کے محمد عثمان نائب صدر، ہم نیوز کے ریحان احمد اور 24 نیوز کے میاں طاہر جوائنٹ سیکریٹریز ہوں گے جبکہ شہاب محمود فنانس سیکریٹری کی ذمہ داری ادا کریں گے۔ ایگزیکٹو کمیٹی کے دیگر اراکین میں مبارک علی، اویس اقبال، محمد نوشاد علی، کامران لاشاری، محسن رضا، معصوم رضوی، عماد یوسف اور زاہد مظہر شامل ہیں۔
اجلاس کے موقع پر مختلف قراردادیں بھی منظور کی گئیں۔
