ملائیشیا(روشن پاکستان نیوز) کی ریاست تیرنگانو نے بلا شرعی عذر کے نماز جمعہ نہ پڑھنے والے مردوں کیلئے 2 سال قید اور 3ہزار رنگٹ ( 2 لاکھ پاکستانی روپے) کے جرمانے کی سزا کا اعلان کر دیا۔
العربیہ اردو کی رپورٹ کے مطابق ملائیشین اسلامی پارٹی (پی ایس اے) کے زیر انتظام ریاست تیرنگانو میں رواں ہفتے اعلان کیا گیا کہ ایک مرتبہ بھی جمعہ کی نماز چھوڑ دینا قابل سزا جرم تصور کیا جائے گا، ایسے شخص کو شریعت کے تحت سزا کے طور پر 2 سال قید اور 3 ہزار رنگٹ کا بھاری جرمانہ یا دونوں میں سے کوئی بھی ایک سزا سنائی جائے گی۔
واضح رہے کہ اس سے قبل اس ریاست میں 3 مرتبہ نماز جمعہ چھوڑ دینے والے افراد کو سزا دی جاتی تھی۔ ریاستی حکام کے مطابق نماز چھوڑنے والے مردوں کے خلاف عوامی رپورٹس یا گشتوں کے ذریعے کارروائی عمل میں لائی جائے گی۔
مزید پڑھیں: اسمارٹ واچ نے لاپتہ طیارے کا پتہ کیسے لگایا؟دلچسپ خبر
رپورٹ کے مطابق تیرنگانو ریاستی ایگزیکٹو کونسل کے رکن محمد خلیل عبدالہادی کا کہنا ہے کہ ’سزا سے قبل یاددہانی اہم ہے کیونکہ جمعہ کی نماز نہ صرف ایک مذہبی علامت ہے بلکہ مسلمانوں کے درمیان فرمانبرداری کا اظہار بھی ہے‘۔
محمد خلیل عبد الہادی نے مزید کہا کہ ’جمعہ کی نماز نہ پڑھنے والوں کو سزا صرف اس صورت دی جائیگی جب لوگوں کو جمعہ کی نماز پڑھنے کی یاد دہانی دی جائے لیکن اس کے باوجود وہ نماز ادا نہ کریں‘۔
