سڈنی(روشن پاکستان نیوز) آسٹریلیا کی بگ بیش لیگ کی تاریخ میں پہلی بار ایک اننگز میں 2 سنچریاں بن گئیں جبکہ ایک میچ میں سب سے زیادہ چھکوں کا ریکارڈ قائم ہوگیا۔
جمعہ کو بگ بیش ٹی ٹوئنٹی لیگ میں برسبین ہیٹ نے پرتھ اسکارچرز کو 8 وکٹ سے مات دے کر کئی ریکارڈ بنا دیے۔
برسبین میں کھیلے گئے میچ میں پہلے پرتھ اسکارچرز نے بیٹنگ کی اور مقررہ 20 اوورز میں 6 وکٹ پر 257 رنز کا پہاڑ کھڑا کر دیا۔
پرتھ اسکارچرز کی جانب سے فن ایلن نے 79 اور کُوپر کونولی نے 77رنز کی اننگز کھیلیں۔
مزید پڑھیں: کرکٹ آسٹریلیا کا بی بی ایل کھیلنے والے پاکستانی کھلاڑیوں سے متعلق اہم اعلان
جواب میں برسبین ہیٹ نے 258 رنز کا ہدف میچ کے آخری اوور کی پانچویں گیند پر صرف 2 وکٹوں کے نقصان پر حاصل کرلیا۔
برسبین ہیٹ کی جانب سے جیک ولڈر موتھ 110 رنز کے ساتھ ناقابل شکست رہے جبکہ میٹ رنشا نے 102رنز بنائے۔
دونوں کھلاڑیوں نے بگ بیش لیگ کی تاریخ کی سب سے بڑی 212رنز کی شراکت بھی قائم کی جبکہ پہلی بار ایک اننگز میں 2 سنچریاں بنیں۔
اس میچ میں مجموعی طور پر 515 رنز بنے اور بگ بیش کی تاریخ کے ایک میچ میں سب سے زیادہ 36 چھکوں کا ریکارڈ بھی قائم ہوا۔
258 رنز کا ہدف بگ بیش کی تاریخ کا سب سے بڑا اور ٹی ٹوئنٹی کی تاریخ کا تیسرا سب سے بڑا ہدف تھا جو حاصل کیا گیا۔
