راولپنڈی(محمد زاہد خان) جشن آزادی کی تقریبات میں شجرکاری، خواتین کرکٹ، اے ایف ایل اور بیس بال میچز کرائیں گے تفصیلات کے مطابق خدمت خلق مقدس جذبے کیساتھ عظیم عبادت بھی ہے، نوجوان نسل کو کھیلوں جیسی مثبت سرگرمیاں فراہم کرنا معاشرے کو برائیوں سے پاک کرنے کا بنیادی اقدام ہے۔ یوتھ ایجوکیشن اینڈ سپورٹس ویلفیئر سوسائٹی رجسٹرڈ راولپنڈی پاکستان میں کھیلوں کے فروغ، خصوصاً بچیوں کو محفوظ اور باعزت طریقے سے کھیلوں کی سہولیات فراہم کرنے کیلئے سرگرم ہے،ان خیالات کا اظہار ڈائریکٹر جنرل پی ایچ اے و چیئرمین یس (YES) احمد حسن رانجھا نے یوتھ ایجوکیشن اینڈ سپورٹس ویلفیئر سوسائٹی کی ساتویں سالگرہ کی تقریب سے خطاب کرتے ہوئے کیا اس موقع پر فلاحی تنظیم کے صدر ڈاکٹر زاہداعوان، نائب صدر سابق ٹیسٹ کرکٹر نوید قریشی و دیگر مہمان بھی موجود تھے۔
احمد حسن رانجھا نے بتایا کہ یوتھ ایجوکیشن اینڈ سپورٹس ویلفیئر سوسائٹی نے وطن عزیز کا 78واں جشن آزادی، معرکہ حق کا جشن فتح اور یوم دفاع شایان شان طریقے سے منانے کیلئے پارکس اینڈ ہارٹیکلچر اتھارٹی (پی ایچ اے) راولپنڈی اور ڈسٹرکٹ سپورٹس ڈیپارٹمنٹ راولپنڈی کیساتھ مل کر متعدد پروگرام ترتیب دئیے ہیں جن میں 14 اگست کو شجرکاری، 22 سے 24 اگست تک ویمن ٹی ٹین کرکٹ لیگ اور 6 ستمبر کو آسٹریلین فٹ بال (اے ایف ایل) اور بیس بال کے خواتین میچز نمایاں ہیں۔
اِحمد حسن رانجھا نے کہا کہ نوجوان نسل کو کھیلوں کی جدید سہولیات اور عالمی معیار کی ٹریننگ مہیا کرنے کیلئے راولپنڈی میں مختلف کھیلوں کی اکیڈمیوں کا جال بچھایا جائے گا تاکہ ہر بچے کو اس کی رہائش کے قریب کھیلوں کی سہولیات میسر ہوں اور وہ منفی سرگرمیوں سے دور رہ سکے۔
