واشنگٹن:(روشن پاکستان نیوز) پاکستان کرکٹ بورڈ (پی سی بی) کے چئیرمین محسن نقوی نے یو ایس اے کرکٹ کے چیف ایگزیکٹو آفیسر جوناتھن اٹکیسن سے ملاقات کی، جس میں پاکستان اور امریکہ کے درمیان کرکٹ سیریز کرانے کے امکانات پر تبادلہ خیال کیا گیا۔ اس ملاقات میں پاکستان، امریکہ اور کینیڈا کے درمیان ٹرائی سیریز کے انعقاد کی بات بھی کی گئی، اور دونوں ممالک کی مینز اور ویمنز کرکٹ ٹیموں کے مابین سیریز کرانے پر اتفاق کیا گیا۔
چئیرمین پی سی بی نے اس موقع پر یو ایس اے کرکٹ کے سی ای او کو پاکستان میں تربیت کے لیے امریکہ کے کوچز کو مدعو کرنے کی پیشکش کی اور اس بات کا عہد کیا کہ پی سی بی امریکہ میں کرکٹ کے فروغ کے لیے ہر ممکن تعاون فراہم کرے گا۔ انہوں نے یو ایس اے کرکٹ کے چیف ایگزیکٹو آفیسر کو چیمپئنز ٹرافی ٹورنامنٹ کے میچز دیکھنے کے لیے پاکستان آنے کی دعوت بھی دی۔
محسن نقوی نے کہا کہ پاکستان اور امریکہ کے درمیان کرکٹ کے فروغ کے بے شمار مواقع ہیں اور دونوں ممالک کے بورڈز جلد ہی کرکٹ سیریز کے پروگرام کو حتمی شکل دیں گے۔
یو ایس اے کرکٹ کے چیف ایگزیکٹو آفیسر نے چئیرمین پی سی بی کی دعوت کا شکریہ ادا کیا اور کہا کہ وہ چیمپئنز ٹرافی میں شرکت کے لیے پاکستان آنے کے خواہشمند ہیں۔ اس موقع پر پی ایس ایل کے سی ای او سلمان نصیر بھی موجود تھے۔
ملاقات کے دوران دونوں جانب سے کرکٹ کے فروغ کے حوالے سے اہم بات چیت کی گئی، جس سے دونوں ممالک کے کرکٹ تعلقات میں مزید بہتری کی توقع ہے۔
مزید پڑھیں: عمران خان کی بیٹوں سے بات کرانے اور سہولیات کی درخواست ، سپرنٹنڈنٹ جیل کل عدالت طلب
