بالاکوٹ(روشن پاکستان نیوز) پاکستان میں پہلی مرتبہ ہاٹ ایئر بیلون کا آغاز کر دیا گیا ہے، جو ایڈونچر سیاحت کے شوقین افراد کے لیے ایک نئے اور منفرد تجربے کی پیشکش ہے۔
تفصیلات کے مطابق، دنیا کے بلند ترین ہاٹ ایئر بیلون کو پاکستان میں پہلی بار ضلع مانسہرہ کے تاریخی مقام بالاکوٹ میں لانچ کیا گیا ہے۔ اس بیلون کا باقاعدہ افتتاح کیا گیا اور یہ اقدام پاکستان میں ونٹر ٹورازم اور بین الاقوامی سیاحت کے فروغ کے لیے ایک سنگ میل ثابت ہو گا۔
بیلون پائلٹ عبدالباسط کا کہنا تھا کہ اب ایڈونچر کے شوقین سیاحوں کو بیرون ملک جانے کی ضرورت نہیں، کیونکہ وہ ہاٹ ایئر بیلون میں بیٹھ کر دریائے کنہار اور کاغان ویلی کے بلند و بالا سیاحتی مقامات کے دلکش مناظر سے لطف اندوز ہو سکیں گے۔
یاد رہے کہ ترکی، تھائی لینڈ اور چین جیسے ممالک ہاٹ ایئر بیلوننگ کے ذریعے سیاحوں کی دلچسپی حاصل کرنے میں کامیاب ہو چکے ہیں، اور اب پاکستان بھی اس منفرد تجربے سے سیاحوں کو اپنی جانب متوجہ کرنے میں کامیاب ہو گیا ہے۔
مزید پڑھیں: کامن ویلتھ گیمز 2026 سے 9 مشہور کھیلوں کا خاتمہ
یہ ہاٹ ایئر بیلون رائیڈز پیشہ ورانہ کمپنیوں کی طرف سے چلائی جاتی ہیں جو اپنے صارفین کو محفوظ اور دلچسپ تجربات فراہم کرنے کے لیے جدید آلات اور سخت حفاظتی پروٹوکولز استعمال کرتی ہیں تاکہ مسافروں کو مکمل اعتماد کے ساتھ پرواز کے دوران اپنی حفاظت اور آرام کا احساس ہو۔
اس اقدام سے پاکستان کے سیاحتی شعبے میں ایک نیا باب کھلنے کی توقع کی جا رہی ہے، جس سے نہ صرف مقامی سیاحت کو فروغ ملے گا بلکہ بین الاقوامی سطح پر بھی پاکستان کی سیاحت کی اہمیت میں اضافہ ہوگا۔
