اسلام آباد(روشن پاکستان نیوز) جے شاہ گریگ بارکلے کی جگہ بلا مقابلہ آئی سی سی کے نئے چیئرمین منتخب ہو گئے ہیں، وہ یکم دسمبر کوعہدے کا چارج سنبھالیں گے۔
کرک انفو کے مطابق جے شاہ، جو اس وقت بی سی سی آئی کے سیکریٹری ہیں، اس عہدے پر فائز ہونے والے سب سے کم عمر(35 سال) آئی سی سی چیئرمین ہیں۔ بارکلے، جو 2020 سے دوسری مدت کے لیے آئی سی سی کے چیئرمین تھے، نے بورڈ کو تصدیق کی تھی کہ وہ تیسری مدت کے لیے امیدوار نہیں ہونگے، بورڈ آف ڈائریکٹرز کے پاس اگلے چیئرمین کی نامزدگی داخل کرنے کے لیے 27 اگست تک کا وقت تھا۔ صرف ایک سے زیادہ امیدواروں کی نامزدگی کی صورت میں انتخاب ہونا تھا، لیکن جے شاہ صرف واحد امیدوار تھے۔
جے شاہ نے ایک بیان میں کہا’’میں بین الاقوامی کرکٹ کونسل کے چیئرمین کے طور پر نامزدگی پر شکرگزار ہوں۔ میں کرکٹ کو مزید عالمگیر بنانے کے لیے آئی سی سی کی ٹیم اور اپنے رکن ممالک کے ساتھ مل کر کام کرنے کے لیے پرعزم ہوں۔ ہم ایک ایسے نازک موڑ پر کھڑے ہیں جہاں متعدد فارمیٹس کے بقائے باہمی کو متوازن کرنا، جدید ٹیکنالوجی کو اپنانے کو فروغ دینا، اور اپنی مارکی کو متعارف کرانا بہت اہم ہے۔ نئی عالمی منڈیوں میں ایونٹس کا انعقاد ہمارا مقصد، کرکٹ کو پہلے سے زیادہ جامع اور مقبول بنانا ہے۔
ہمیں دنیا بھر میں کرکٹ کے لیے محبت کو بڑھانے کے لیے نئی سوچ اور اختراع کو بھی اپنانا چاہیے۔لاس اینجلس 2028 کے اولمپکس میں ہمارے کھیل کی شمولیت کرکٹ کی ترقی کے لیے ایک اہم موڑ کی نمائندگی کرتی ہے، اور مجھے یقین ہے کہ یہ کھیل کو بے مثال طریقوں سے آگے بڑھائے گا۔
جے شاہ جگموہن ڈالمیا، شرد پوار، این سری نواسن اور ششانک منوہر کے بعد آئی سی سی کے سربراہ ہونے والے پانچویں ہندوستانی ہیں۔
2009 میں ریاست گجرات میں اپنے کرکٹ ایڈمنسٹریشن کیریئر کا آغاز کرنے کے بعد، جےشاہ اکتوبر 2019 سے بی سی سی آئی کے سیکرٹری ہیں۔ 2022 میں وہ آئی سی سی کی بااثر فنانس اینڈ کمرشل افیئرز (ایف اینڈ سی اے) کمیٹی کا حصہ بنے اور اس کی ذمہ داری سنبھالی۔
مزیدپڑھیں: پاکستان کرکٹ ٹیم کو بنگلہ دیش سے شکست پر شاہد آفریدی پھٹ پڑے
جےشاہ 2022 میں بی سی سی آئی کے سیکرٹری کے طور پر بھی دوبارہ منتخب ہوئے اور ان کی مدت ملازمت 2025 تک چلنی تھی۔ ایک بار جب وہ آئی سی سی کی صدارت سنبھالیں گے، تو انہیں بی سی سی آئی اور آئی سی سی کی ایف اینڈ سی اے کمیٹی میں اپنے عہدے سے دستبردار ہونا پڑے گا۔ جےشاہ 2021 سے 2024 تک ایشین کرکٹ کونسل کے صدر بھی رہے۔
