اسلام آباد(روشن پاکستان نیوز)پاکستان کرکٹ ٹیم کے سابق کپتان شاہد آفریدی بنگلہ دیش کے خلاف ٹیسٹ سیریز کے پہلے میچ میں قومی ٹیم کی شکست پر پھٹ پڑے۔
سماجی رابطے کی سائٹ ’ایکس‘ پر اپنے ایک بیان میں انہوں نے کہاکہ 10 وکٹوں سے قومی ٹیم کو شکست کے بعد پچ کی تیاری پر سوالات اٹھتے ہیں۔
میڈیا رپورٹ کے مطابق شاہدآفریدی نے کہاکہ 4 فاسٹ بولرز کا انتخاب اور ایک ماہر اسپنر کو ڈراپ کرنے پر بھی سنگین سوالات اٹھتے ہیں۔
شاہد آفریدی نے کہاکہ بنگلہ دیش کی ٹیم نے پورے ٹیسٹ میچ میں بہترین کرکٹ کھیلی جس کا کریڈٹ ان سے چھینا نہیں جاسکتا۔
واضح رہے کہ پاکستان بنگلہ دیش ٹیسٹ سیریز کے پہلے میچ میں بنگلہ دیش نے پاکستان کو 10 وکٹوں سے شکست دے دی ہے، میچ کا فیصلہ آخری روز میں ہوا۔
قومی ٹیم کو پہلے ٹیسٹ میچ میں شکست پر چیئرمین پی سی بی محسن نقوی نے بنگلہ دیشی کرکٹ ٹیم کو مبارکباد دیتے ہوئے امید ظاہر کی کہ قومی ٹیم دوسرے ٹیسٹ میں کارکردگی دکھائے گی۔
دوسری جانب قومی ٹیسٹ ٹیم کے کپتان شان مسعود نے شکست کے بعد کہاکہ راولپنڈی ٹیسٹ میں شکست کی وجہ پچ ہے۔
مزید پڑھیں: بھارتی کرکٹر شیکھر دھون کاریٹائرمنٹ کا اعلان
