ممبئی(روشن پاکستان نیوز) بالی وڈ لیجنڈ اداکار دھرمیندر کی موت کے بعد ان کی اہلیہ اداکارہ ہیما مالنی نے ان کے ساتھ اپنی یادگار تصاویر اور پیغام جاری کردیا۔

ہیما مالنی نے ایکس پر ایک طویل پیغام لکھا اور ساتھ ہی کچھ یادگار تصاویر شیئر کیں۔

اداکارہ نے لکھا دھرم جی! وہ میرے لیے بہت کچھ تھے، پیار کرنے والے شوہر، ہماری دوبیٹیوں کے باپ، ایک دوست، فلسفی، گائیڈ، شاعر، میری ہر ضرورت کے وقت کام آنے والے۔

اداکارہ نے لکھا  ایک عوامی شخصیت کے طور پران کی قابلیت، ان کی مقبولیت کے باوجود ان کی عاجزی نے انہیں دوسروں سے مختلف کیا،  فلم انڈسٹری میں ان کی لازوال شہرت اور کامیابیاں ہمیشہ قائم رہیں گی۔

مزید پڑھیں: علامہ اقبال کے یوم ولادت پر ایرانی سفیر رضا امیری مقدم کا پیغام

ہیما مالنی نے مزید لکھا کہ میرا ذاتی نقصان ناقابل بیان ہے اور جو خلا پیدا ہوا ہے وہ ساری زندگی رہے گا، برسوں اکٹھے رہنے کے بعد میرے پاس بہت سے خاص لمحات کو زندہ کرنے کے لیے بے شمار یادیں ہیں۔

انہوں نے اپنی اور دھرمیندر کی متعدد تصاویر شیئر کیں۔

واضح رہے کہ دھرمیندر 89 برس کی عمر میں پیر 24 نومبر کو ممبئی میں انتقال کرگئے جس کے بعد ان کے چاہنے والوں نے سوشل میڈیا پر شدید دکھ کا اظہار کیا۔