دبئی(روشن پاکستان نیوز) دبئی ایئر شو کے دوران بھارتی فضائیہ کے لڑاکا طیارہ تیجس گر کر تباہ ہونے اور پائلٹ کے جاں بحق ہونے پر بالی ووڈ کے متعدد معروف فنکاروں نے حکومت پر شدید تنقید کی اور مطالبہ کیا کہ اس قسم کے حادثات کی تحقیقات شفاف اور بروقت کی جائیں۔
اداکارہ پریانکا چوپڑا نے واقعے پر گہرے دکھ کا اظہار کرتے ہوئے کہا کہ پائلٹ کے اہل خانہ کے حق میں مکمل معلومات فراہم کی جائیں اور ایسے حادثات کی روک تھام کے لیے حفاظتی اقدامات کو مضبوط بنایا جائے۔
جیہ بچن نے بھی اس بات پر زور دیا کہ فضائیہ کے عملے کے لیے محفوظ ماحول اور سخت حفاظتی پروٹوکول یقینی بنانے کی ضرورت ہے۔
شتروگھن سنہا نے حکومت سے اپیل کی کہ فضائی مشقوں کے دوران حفاظتی معیار اور ٹیسٹنگ کے عمل کو مزید مضبوط بنایا جائے تاکہ مستقبل میں ایسے سانحات سے بچا جا سکے۔
مزید پڑھیں: دبئی ائیر شو انتظامیہ کا بھارتی طیارہ گرنے کی تحقیقات کا اعلان، مزید فضائی مظاہرے عارضی طور پر معطل
اداکار اکشے کمار نے پائلٹ اور اس کے اہل خانہ کے ساتھ ہمدردی کا اظہار کیا اور قوم سے اپیل کی کہ وہ اس قربانی کو یاد رکھے۔ رتھک روشن نے واقعے کو نہ صرف بھارتی فضائیہ بلکہ پوری قوم کے لیے ایک المیہ قرار دیا، جبکہ مشہور اداکار رجنی کانت نے پائلٹ کی خدمات کو خراج تحسین پیش کیا اور دکھ کا اظہار کیا۔
ماہرین کے مطابق اس حادثے نے نہ صرف ایئر شو کی سیکیورٹی پروٹوکولز پر سوالات اٹھا دیے ہیں بلکہ فضائی مشقوں کے دوران حفاظتی معیار کو بہتر بنانے کی ضرورت کو بھی اجاگر کیا ہے۔
