اسلام آباد(روشن پاکستان نیوز) ویڈیو شیئرنگ کی مقبول ایپ ٹک ٹاک نے سنہ 2025ء کی دوسری سہ ماہی(Apr – Jun 2025) کے لیے کمیونٹی گائیڈلائنز انفورسمنٹ رپورٹ جاری کر دی ہے ۔

رپورٹ کے مطابق رواں سال کی دوسری سہ ماہی کے دوران پاکستان میں مجموعی طور پر 25,448,992 ویڈیوز کمیونٹی گائیڈ لائنز کی خلاف ورزی پر حذف کی گئیں۔

پاکستان میں فعال انداز میں کانٹینٹ ہٹانے کی شرح 99.7 فی صد رہی جبکہ حذف شدہ ویڈیوز میں سے 96.2 فیصد ویڈیوز اپ لوڈ کیے جانے کے 24 گھنٹوں کے اندر ہٹا دی گئیں۔

سہ ماہی کے دوران،عالمی سطح پر، ٹک ٹاک نے مجموعی طور پر 189ملین ویڈیوز حذف کیں، جو پلیٹ فارم پر اپ لوڈ کیے گئے کل کانٹینٹ کا تقریباً 0.7فیصد بنتی ہیں۔

حذف کی گئی ویڈیوز میں سے163,962,241 ویڈیوزخودکار ٹیکنالوجیز کی نشاندہی پرحذف کی گئیں جبکہ 7,457,309 ویڈیوز مزید جائزے کے بعد دوبارہ بحال کر دی گئیں۔

فعال انداز میں کانٹینٹ کوحذف کرنے کی شرح 99.1 فیصد رہی، اور اُن میں 94.4 فیصد نشان زدہ کانٹینٹ کو پوسٹ کیے جانے کے 24 گھنٹوں کے اندر حذف کر دیا گیا۔

ایپ کی ساکھ کو برقرار رکھنے کے لیے، اس سہ ماہی میں، پلیٹ فارم نے76,991,660 جعلی اکاؤنٹس حذف کیے اور مزید 25,904,708ایسے اکاؤنٹس بھی حذف کیےگئے جن کے بارے میں شبہ تھا کہ وہ 13 سال سے کم عمر صارفین کے تھے۔

مزید پڑھیں: ’خود کو مرتے دیکھ رہا تھا‘، سنجے دت نے نشے کی لت سے چھٹکارا کیسے پایا؟

مذکورہ رپورٹ سے یہ بھی ظاہر ہوتا ہے کہ عالمی سطح پر حذف کی گئیں ویڈیوز کا ایک بڑا حصہ یعنی 30.6 فی صدایسے حساس یا بالغ کانٹینٹ پر مشتمل تھا جو ٹک ٹاک کی پالیسیوں کے مطابق نہیں تھا۔

اس کے علاوہ 14.0 فی صد ویڈیوز نے پلیٹ فارم کے حفاظتی اور شائستگی کے معیار کی خلاف ورزی کی جبکہ 6.1 فی صد ویڈیوز رازداری اور سیکیورٹی سے متعلق ہدایات کے برخلاف تھیں۔

مزید برآں، حذف کی گئیں45.0 فی صد ویڈیوز کو غلط معلومات کے طور پر رپورٹ کیا گیا تھا اور 23.8 فی صد ویڈیوز ایڈیٹ کردہ میڈیا یا مصنوعی ذہانت (AI) سے تیار کردہ کانٹینٹ پر مشتمل تھیں۔