لیڈز (روشن پاکستان نیوز) — نوجوان اسٹار گلوکار جیسن ایلن ان دنوں اپنے منفرد انداز کی وجہ سے خبروں کی زینت بنے ہوئے ہیں۔ انہوں نے اپنے آئندہ “Music for Millennials” ٹور کی پروموشن کے لیے لیڈز شہر کی گلیوں کا رُخ کیا، جہاں وہ مداحوں میں خود ٹکٹ تقسیم کرتے، تصاویر بنواتے اور اپنے موسیقی سے وابستہ تجربات شیئر کرتے نظر آئے۔ لیڈز سٹی سینٹر میں انہوں نے فیملیز اور نوجوان شائقین کے ساتھ وقت گزارا، ان کے ساتھ تصویریں بنوائیں اور متعدد افراد کو مفت ٹکٹ بھی دیئے۔
جیسن ایلن نے اس موقع پر میڈیا سے گفتگو میں کہا کہ “میوزک میرا شوق ہے، اور میں آٹھ سال کی عمر سے گانا گا رہا ہوں۔ یہ میری پہچان ہے، اور میں چاہتا ہوں کہ ہر نوجوان کو اپنے جذبے کو اپنانے کا موقع ملے۔”
انہوں نے اپنی ٹور پروموشن کے لیے ایک منفرد حکمت عملی اپنائی ہے، جس کے تحت وہ خود گلیوں میں نکل کر لوگوں کو پرچے (فلاٸرز) تھما رہے ہیں۔ یہی براہِ راست رابطہ گزشتہ ہفتے اس وقت تنازعے کا باعث بن گیا جب ایک مقامی نوجوان نے ان کا سامان چھوا، جس کے نتیجے میں دونوں کے درمیان تلخ کلامی اور جھگڑے کی صورتحال پیدا ہوئی، اور اس واقعے کی ویڈیو سوشل میڈیا پر وائرل ہو گئی۔
جیسن نے اس حوالے سے اعتراف کیا کہ انہیں سڑکوں پر گاتے ہوئے اکثر چیلنجز کا سامنا رہتا ہے۔ ان کے الفاظ میں: “میں سڑک پر گاتا ہوں اور تقریباً ہر بار کوئی مجھے مارنے کی کوشش کرتا ہے”۔ تاہم، ان کا ماننا ہے کہ یہی جدوجہد ان کی فنکارانہ شناخت کا حصہ ہے اور ان کی باسکنگ (اسٹریٹ پرفارمنس) دوسرے فنکاروں سے منفرد ہے۔
ان کا “Music for Millennials” ٹور 5 جولائی کو بیلگریو میوزک ہال، لیڈز میں منعقد ہوگا، جس کے لیے ٹکٹنگ کا آغاز ہو چکا ہے۔
معیاری ٹکٹ: £10
VIP ٹکٹ: £30، جس میں £15 کا مرچنڈائز واؤچر، میٹ اینڈ گریٹ، HD فوٹوگرافی، خصوصی رسٹی بینڈ اور گڈی بیگ شامل ہے۔
اگرچہ سڑکوں پر پروموشن کے دوران تنازعات نے توجہ حاصل کی، مگر ساتھ ہی ساتھ ٹک ٹاک اور فیس بک پر ان کی ویڈیوز اور انداز کو بھی کافی پذیرائی ملی ہے۔ مقامی نوجوانوں میں ان کی فنکارانہ جدوجہد اور جذبہ قابلِ تحسین قرار دیا جا رہا ہے، جو انہیں ایک منفرد اور متاثر کن شخصیت میں تبدیل کر رہا ہے—چاہے حالات کتنے ہی مشکل کیوں نہ ہوں۔
