اسلام آباد(روشن پاکستان نیوز) گوگل ایپس میں، گوگل میپس جو سفر، راستوں اور مقامات کی تلاش کے لیے صارفین کا اولین انتخاب ہے۔ گوگل میپس میں صارفین کے لیے ایک نیا اور دلچسپ فیچر متعارف کرایا جا رہا ہے جسے ’یور ریسنٹ پلیسز‘ کہا جاتا ہے۔
یہ فیچر صارفین کو حالیہ دنوں میں وزٹ کیے گئے مقامات کو آسانی سے دیکھنے اور دوبارہ تلاش کرنے کی سہولت فراہم کرے گا۔ اس سے پہلے صارفین کو اپنی وزٹ ہسٹری تلاش کرنے کے لیے ایپ کے اندر مختلف مینیو میں جانا پڑتا تھا مگر اب یہ معلومات سیدھا سامنے دستیاب ہوں گی۔
نیا سیکشن گوگل میپس کے ”You“ ٹیب میں ”Your lists“ کے اوپر موجود ہوگا۔ اس میں حالیہ دوروں کی تفصیلات درج ہوں گی جنہیں صارف فوری طور پر دیکھ سکیں گے۔ ساتھ ہی چار اہم فلٹرز بھی دیے گئے ہیں جن میں ایریا، کیٹیگری، سیوڈ اور میپس ہسٹری شامل ہیں۔ کیٹیگری پر کلک کرنے سے مزید ذیلی فلٹرز سامنے آئیں گے جیسے فوڈ اینڈ ڈرنک، کلچر، شاپنگ اور ہوٹلز وغیرہ، جس سے مخصوص جگہوں کو تلاش کرنا پہلے سے زیادہ آسان ہو جائے گا۔
ہر لوکیشن انٹری کے ساتھ ایک بک مارک آئیکون اور تھری ڈاٹ مینیو بھی دیا گیا ہے۔ بک مارک کے ذریعے کسی بھی مقام کو لسٹ میں محفوظ کیا جا سکتا ہے جبکہ تھری ڈاٹ مینیو میں شیئرنگ، مزید تفصیلات دیکھنے اور ہسٹری سے ڈیلیٹ کرنے کے آپشنز بھی موجود ہوں گے۔ اس طرح صارفین نہ صرف اپنی وزٹ ہسٹری کو منظم کر سکیں گے بلکہ کسی جگہ کو محفوظ یا دوسروں کے ساتھ شیئر بھی کرسکیں گے۔
یہ نیا فیچر گوگل میپس کے پہلے سے موجود ’ٹائم لائن‘ فیچر سے زیادہ آسان اور سہل ہے کیونکہ ٹائم لائن ایپ کے اندرونی حصے میں چھپا ہوا ہوتا تھا جبکہ ”یور ریسنٹ پلیسز“ براہ راست نظر آئے گا۔
اس نئے سیکشن کا مقصد موجودہ ٹائم لائن خصوصیت کے مقابلے میں ان جگہوں کو تلاش کرنا آسان بنانا ہے جن کا آپ نے حال ہی میں دورہ کیا ہے۔ فی الحال یہ فیچر اینڈرائیڈ پر متعارف کرایا جا رہا ہے، تاہم دیگر پلیٹ فارمز پر اس کی دستیابی یا اجرا کے بارے میں کوئی باقاعدہ اعلان نہیں کیا گیا۔
مزید پڑھیں: گوگل نے جی میل صارفین کیلئے نیا فیچر متعارف کرا دیا
