پشاور(روشن پاکستان نیوز) خیبرپختونخوا اسمبلی کے نو منتخب اراکین کی حلف برداری کے لیے اجلاس آج ہوگا جو تاخیر کا شکار ہے۔
خیبرپختونخوا اسمبلی کے نومنتخب اراکین کی حلف برداری کے لیے آج اجلاس صبح 11 بجے طلب کیا گیا تھا جو تاحال شروع نہیں ہوسکا ہے، صوبائی اسمبلی کے 115 نو منتخب اراکین آج حلف اٹھائیں گے۔
انتظامیہ نے اسمبلی اجلاس میں شرکت کے لیے ایک ہزار سے زائد پاسز ایشو کررکھے ہیں اور اسمبلی میں لوگوں کی گنجائش اس سے کم ہے جس کے باعث اجلاس سے قبل ہی اسمبلی میں شدید بدنظمی دیکھنے میں آئی ہے۔
اسمبلی کے اجلاس کو دیکھنے کے خواہشمند دھکم پیل کرتے ہوئے اسمبلی ہال میں گھس گئے اور متعدد ایسے افراد بھی اسمبلی ہال میں داخل ہوئے جن کے پاس پاسز موجود نہیں تھے، اس دوران لوگوں کے درمیان شدید دھینگا مشتی بھی ہوئی اور جسے جہاں موقع ملا وہ وہاں جاکر بیٹھ گیا۔
مزید پڑھیں: خیبرپختونخوااسمبلی کااجلاس آج ہوگا ،منتخب نمائندےحلف اٹھائیں گے
پولیس نے شدید بدنظمی کے بعد اسمبلی کا گیٹ بند کردیا لیکن کارکنان باہر کے راستوں سے پھلانگ کر اسمبلی کی حدود میں داخل ہوگئے، بدنظمی کی وجہ سے کئی میڈیا نمائندوں کوبھی اسمبلی کے اندر داخل ہونے کا موقع نہ ملا اور بیشتر نو منتخب ارکان کو گاڑیوں کی پارکنگ میں پریشانی کا سامنا کرنا پڑا۔
