اسلام آباد ( روشن پاکستان نیوز ) پاکستان پیپلز پارٹی کی مرکزی رہنما سحر کامران نے کہا ہے کہ 2022 کے تباہ کن سیلاب کے بعد سندھ حکومت اور چیئرمین بلاول بھٹو زرداری کی قیادت میں متاثرہ عوام کی بحالی کے لیے تاریخی اقدامات کیے گئے۔ انہوں نے کہا کہ متاثرین کو نہ صرف فوری ریلیف اور ری ہیبلیٹیشن فراہم کی گئی بلکہ مستقبل کو مدنظر رکھتے ہوئے 2.1 ملین کلائمیٹ ریزیسٹنٹ گھروں کی تعمیر کا انیشیٹیو بھی شروع کیا گیا ہے۔
سحر کامران نے کہا کہ سندھ حکومت نے مشکل وقت میں عوام کو تنہا نہیں چھوڑا۔ ’’ہم نے اپنی آنکھوں سے دیکھا کہ چھے چھے فٹ پانی میں فصلیں اور گھر ڈوب گئے، مگر متاثرین کو دوبارہ زندگی کا موقع دیا گیا اور انہیں نئی فصل لگانے کے لیے سہولت فراہم کی گئی۔‘‘
انہوں نے کہا کہ یہ منصوبہ وقتی ریلیف نہیں بلکہ طویل مدتی پالیسی کا حصہ ہے تاکہ آئندہ قدرتی آفات کے دوران عوام زیادہ محفوظ رہ سکیں۔
مزید پڑھیں: سیلاب سے ہونے والی تباہی ماحولیاتی بحران کا ثبوت ہے: سحر کامران کا متاثرہ خاندانوں سے اظہارِ ہمدردی
پیپلز پارٹی رہنما نے مزید کہا کہ یہ وقت سیاست کا نہیں بلکہ حقائق کو تسلیم کرنے کا ہے۔ ’’پارلیمنٹ اور کمیٹیوں میں بیٹھ کر ہم نے ایسے فیصلے کیے جنہوں نے عوام کو سہارا دیا۔ اگر کوئی جماعت پارلیمنٹ سے باہر رہنے کا فیصلہ کرتی ہے تو یہ اس کی اپنی حکمت عملی ہے، لیکن عوامی خدمت کے لیے اداروں کے اندر رہنا زیادہ مؤثر ہے۔‘‘
