اسلام آباد(روشن پاکستان نیوز)مولانا فضل الرحمان نے گرینڈ اپوزیشن الائنس میں باضابط شمولیت کے حوالے سے انکار کردیا ہے اور جے یو آئی کے سینیٹر کامران مرتضی نے کہا ہے کہ اسد قیصر کو تحفظات سے آگاہ کیا تھا مگر 15 روز گزرنے کے باوجود بھی جواب نہیں آیا، جب تک ورکراور قیادت مطمئن نہ ہو آگے نہیں بڑھ سکتے۔اس طرح گرینڈ اپوزیشن الائنس بنانے کا خواب تاحال ادھورا ہے اورذرائع کے مطابق مولانا فضل الرحمان نے گرینڈ اپوزیشن الائنس میں باضابط شمولیت کے حوالے سے انکار کردیا۔ ذرائع کے مطابق مولانا فضل الرحمان کے پی ٹی آئی کے حوالے سے تحفظات تاحال برقرار ہیں اورجے یو آئی کے رہنما کامران مرتضیٰ نے سوشل میڈیا پر گرینڈ الائنس کے بارے میں تحفظات کا اعلان کرتے ہوئے کہا ہے کہ گرینڈ الائنس کا حصہ بننے کے لیے تحفظات اسد قیصر کو بتائے تھے، ایک ٹویٹ میں انہوں نے کہا کہ پی ٹی آئی کی جانب سے 15 روز گزرنے کے باوجود بھی جواب نہیں آیا۔ کامران مرتضیٰ نے کہا کہ ہم نے پی ٹی آئی کے ساتھ ورکنگ ریلیشن شپ تو بنا لیا لیکن جب تک ہمارا ورکر اور قیادت مطمئن نہیں‘ ہم آگے نہیں بڑھ سکتے، مولانا غفور حیدری کی سربراہی میں ہمارا وفد اپوزیشن جماعتوں کی کانفرنس میں شرکت کرے گا۔
مزید پڑھیں: ن لیگ کے دور حکومت میں کیسے خواتین کو تشدد کا نشانہ بنایاگیا؟ وائرل ویڈیو نے تہلکہ مچادیا
