لاہور (روشن پاکستان نیوز) وزیر اطلاعات پنجاب عظمیٰ بخاری نے کہا ہے کہ پنجاب پولیس کچے کے ڈاکوؤں کو پکڑ رہی ہے، پکے کے ڈاکوؤں کو بھی پکڑے گی، پنجاب پولیس کا ڈنڈا بہت تگڑا ہے۔

وزیر اطلاعات پنجاب نے قومی اسمبلی میں قائد حزب اختلاف اور پی ٹی آئی رہنما عمر ایوب کے بیان پر ردعمل میں کہا ہے کہ پنجاب پولیس کسی بے گناہ کو تنگ نہیں کرتی، اور کسی ریکارڈ یافتہ مجرم کو چھوڑتی نہیں۔

انہوں نے کہا کہ پنجاب پولیس کی سب سے بڑی کوالٹی یہی ہے ان کا ڈنڈا بہت تگڑا ہے، 9 مئی اور 26 نومبر کے جعلی انقلابیوں کو انقلاب لانے کا شوق تھا تو پرچے بھی بھگتیں۔

عظمیٰ بخاری نے کہا کہ پنجاب میں انتقامی کاروائی یا سیاسی بنیادوں پر مقدمات درج کرنے کا سلسلہ بند ہو چکا، وزیر اعلیٰ مریم نواز کی حکومت میں پنجاب پولیس مکمل طور پر غیر سیاسی ہے، اور غیر جانبدار ہو کر اپنا کام کر رہی ہے۔

واضح رہے کہ پی ٹی آئی رہنما عمر ایوب نے کہا تھا کہ پنجاب پولیس کچے کے ڈاکوؤں کا مقابلہ نہیں کر سکتی، لیکن پی ٹی آئی کارکنوں کے خلاف فوری کارروائی کر دیتی ہے۔