اسلام آباد(روشن پاکستان نیوز) رہنما پاکستان مسلم لیگ (ن) و مشیر برائے بین الاصوبائی رابطہ رانا ثنا اللہ نے کہا ہے کہ سیاسی جماعتیں ہی ملک کو آگے لے جاسکتی ہیں۔
اسلام آباد میں تقریب سے خطاب کرتے ہوئے ان کا کہنا تھا کہ ملک سیاست اور سیاسی جماعتوں سے ہی چلتا ہے، ہم نے ان چیزوں کا نام سیاست کیوں رکھ دیا جن کی وجہ سے کوئی معاشرہ آگے نہیں بڑھ سکتا، اگر جھوٹ بولا جاتا ہے تو ہم کہتے ہیں کہ یہ سیاست ہے، ہٹ دھرمی کرتے ہیں تو ہم کہتے ہیں کہ سیاست ہے، اگر کسی سے زور زبردستی ہوتی ہے تو ہم کہتے ہیں سیاست ہورہی ہے، ہمیں اس بیانیے کو ختم کرنا چاہیے۔
انہوں نے کہا کہ ہمیں بحیثیت قوم اپنے رویوں پر نظر ثانی کرنی چاہیے، ہم میں بہت اچھی روایات ہیں لیکن جو ہمارے منفی رویے ہیں ان پر احتسابی جائزہ لینا چاہیے، میرا تعلق ایسی جگہ سے تھا جہاں میرا واسطہ لا اینڈ آرڈر سے رہا، میں 10 سال صوبائی قانون رہا، دوسری جگہوں پر میرا تجربہ کم رہا، اب مجھے بین الصوبائی روابط کا عہدہ دیا گیا ہے، مجھے احساس ہے کہ یہ اس لیے سونپا گیا کہ میری سیاسی سائیڈ پر زیادہ مصروفیت رہنی ہے تو سیکریٹیریٹ اسپورٹس کا ایک شعبہ ہونا چاہیے۔
