کازان(روشن پاکستان نیوز) پاکستان پیپلزپارٹی کی سینئر رہنماء اورکن قومی اسمبلی سحر کامران نے کہا ہے کہ کازان فورم میں روس،اسلامی ممالک کے اسٹریٹجک ویژن گروپ کے سالانہ اجلاس میں شرکت کیلئے پرجوش ہوں۔
سوشل میڈیا پر جاری اپنے ایک بیان میں پاکستان پیپلزپارٹی کی سینئر رہنما ورکن قومی اسمبلی سحرکامران نے کہاکہ ہم روس اور مسلم ممالک(او آئی سی) کے درمیان تعلقات کی مضبوطی دیکھ رہے ہیں اور آنے والے وقتوں میں یہ تعلق مزید مضبوط ہوگا۔
انہوں نے کہاکہ تقریباً 15 ملین مسلمانوں کی آبادی والے ملک روس کے ساتھ مضبوط تجارتی تعلقات قائم کیے ہیں اوریہ تعلقات پچھلے سالوں میں 156 بلین ڈالر تک پہنچ چکے ہیں۔
انہوں نے کہا کہ اوآئی سی کے مبصر کے طور پرروس اور مسلم ممالک کے درمیان احترام کی بنیاد پر تعاون بڑھانے کے لیے پرعزم ہوں۔ روسی رہنما تاریخی طور پر اور آج کے دور میں اسلام کی اہمیت کو تسلیم کرتے ہیں۔
انہوں نے کہاکہ او آئی سی کے رکن ممالک اور روس کے درمیان دوستانہ تعلقات نے شراکت داروں کی حیثیت سے ان کی قابل اعتمادی کو ثابت کیا ہے۔ گزشتہ دہائی کے دوران ہونے والی بات چیت نے علاقائی اور عالمی استحکام پر توجہ مرکوز کی ہے۔
انہوں نے کہاکہ صنعت، سیاحت، زراعت، اور ہوابازی میں غیر استعمال شدہ مواقع سمیت گہری اقتصادی شراکت داری کے نمایاں امکانات ہیں۔
انہوں نے کہاکہ ہم مل کر چیلنجوں پر قابو پا سکتے ہیں اور امن کو فروغ دے سکتے ہیں، کشمیر اور فلسطین جیسے مسائل کو اقوام متحدہ کی قراردادوں کے مطابق حل کر سکتے ہیں۔
آخر میں ان کا کہنا تھا کہ آئیے دیرپا امن کے لیے متحد ہوں اور غزہ میں جاری صورتحال سمیت جارحیت اور جبر کا خاتمے کے لئے کوشاں رہینگے۔
