دادو(روشن پاکستان نیوز) سندھ کے معروف تفریحی مقام گورکھ ہل اسٹیشن پر موسمِ سرما کی پہلی برفباری ہو گئی، جس کے باعث علاقے میں سردی کی شدت میں نمایاں اضافہ ہو گیا ہے۔
ضلع دادو میں کیرتھر کے پہاڑی سلسلے کے دامن میں سندھ اور بلوچستان کی سرحدی پٹی پر واقع گورکھ ہل اسٹیشن پر برف پڑنے کے بعد قدرتی مناظر سحر انگیز ہو گئے، جبکہ سیاحوں میں خوشی کی لہر دوڑ گئی۔
محکمہ موسمیات کے مطابق برفباری کے بعد گورکھ ہل اسٹیشن پر درجہ حرارت منفی 2 ڈگری سینٹی گریڈ تک گر گیا ہے، جس کے باعث شدید سردی کا راج ہے۔
واضح رہے کہ گورکھ ہل اسٹیشن وادیٔ مہران کا واحد بلند ترین، سرد ترین اور پرفضا تفریحی مقام ہے، جہاں کئی برسوں بعد موسمِ سرما میں برفباری ہوئی ہے، جو سیاحوں کے لیے خاص کشش رکھتی ہے۔
