اسلام آباد(روشن پاکستان نیوز) پاکستان میں 450 ارب ڈالر کے جواہرات کی موجودگی کا انکشاف ہوا ہے۔
وزیراعظم شہباز شریف کی زیر صدارت اجلاس میں جواہرات اور قیمتی پتھروں کے لیے قومی پالیسی فریم ورک کی منظوری دے دی گئی۔
اجلاس کے دوران وزیراعظم نے ہدایت کی کہ رواں برس فریم ورک میں تفویض کردہ اقدامات پر فوری عمل درآمد یقینی بنایا جائے۔ اجلاس میں کہا گیا کہ پاکستان میں جواہرات اور قیمتی پتھروں کے وسیع ذخائر موجود ہیں، جن کے جغرافیے اور مالیت کے تعین کے لیے ترجیحی بنیادوں پر جیولاجیکل سروے کیا جائے۔
مزید پڑھیں: عظمیٰ بخاری کا پنجاب کی ڈیفامیشن کورٹ میں پہلا کیس دائر کرنے کا اعلان
وزیراعظم نے رواں برس ملک میں جیم اسٹونز سے متعلق دو مثالی سینٹرز آف ایکسیلینس کے قیام کی بھی ہدایت دی، تاکہ پاکستان کے ذخائر کے مقابلے میں برآمدات میں اضافہ ممکن ہو سکے۔
تمام متعلقہ ادارے، صوبائی حکومتیں اور اسٹیک ہولڈرز مشاورت کے عمل میں شامل ہونے کی ہدایت کردی گئی۔ عالمی معیار کی لیبارٹریز اور سرٹیفیکیشنز کے نفاذ کے لیے فوری اقدامات کیے جائیں، جبکہ بیرونی سرمایہ کاری کے لیے موزوں ماحول فراہم کرنا اولین ترجیح ہو۔
