اسلام آباد(روشن پاکستان نیوز) چیئرمین پیپلزپارٹی بلاول بھٹو نے کہا ہے کہ دیوار پر لکھا ہے الیکشن جلد نہیں ہوں گے۔

بلاول بھٹو نے کہا کہ سندھ میں صحت کی بہتر سہولیات ہیں، 18ویں ترمیم کے بعد سندھ میں صحت کے شعبے میں بہت کام ہوا ہے، شعبہ صحت میں سندھ حکومت کا کوئی مقابلہ نہیں کرسکتا۔

چیئرمین پیپلز پارٹی نے کہا کہ سندھ میں بچوں کی شرح اموات کم ہوئی ہے، بچوں کی زندگیاں بچانا اولین ترجیح ہے، دیگر صوبوں کا سندھ سے مقابلہ نہیں کیا جا سکتا، سندھ حکومت وہ کام کررہی ہے جو دوسرے صوبوں میں نہیں ہو رہے۔

کوشش ہے کہ عام عوام کی مشکلات کم ہوں، بلاول بھٹو زرداری نے کہا کہ پاکستان ابھی بھی معاشی مشکلات کا شکار ہے، ملکی معیشت کی ترقی کا تب پتہ چلے گا جب عام آدمی خوشحال ہوگا۔

انہوں نے کہا کہ عام عوام کی قوت خرید میں کمی آئی ہے، ان کا کہنا تھا کہ عام آدمی کاجواب اصل ٹیسٹ ہوتاہے کہ معاشی صورتحال کیا ہے، اس میں کوئی شک نہیں کہ ملک ڈیفالٹ سے بچا ہے، ڈیفالٹ کاخطرہ ٹلنے کے بعد اب مزید معیشت کو بہتر کرنا ہوگا۔

بلاول بھٹو نے کہاکہ پبلک پرائیویٹ پارٹنرشپ کے ذریعے عوام کو بہترین سہولیات دے سکتے ہیں، وفاق کو پبلک پرائیویٹ پارٹنرشپ کے ماڈل کو اپنانا ہوگا، ان کا کہنا تھا کہ سیاسی جماعتوں کو سیاسی راستے نکالنے ہوں گے۔

مزید پڑھیں: سہیل آفریدی کیخلاف ضابطہ اخلاق کیس، الیکشن کمیشن نے دائرہ اختیار پرتحریری جواب طلب کرلیا

انہوں نے کہا کہ کوئی ایک سیاسی جماعت ملک کو مسائل سے نہیں نکال سکتی، بینظیر بھٹو نے ہمیشہ مفاہمت کی بات کی، ان کا کہنا تھا کہ کس نے لمبی اننگز کھیلنی ہے یہ فیصلہ عوام کریں گے، اپوزیشن کی جماعتوں کو بھی ذمہ داری کا مظاہرہ کرنا پڑے گا۔

بلاول بھٹو نے کہا کہ بے نظیر بھٹو کی برسی پر وفد بھیجنے پر نوازشریف کے شکرگزار ہیں، انہوں نے کہا کہ ن لیگ کے وفد سے کوئی سیاسی گفتگو نہیں ہوئی، سیاسی مفاہمت کیلئے صدر زرداری کو اپنا کردار ادا کرنا پڑے گا۔

ایک کیس پر اگر آپ اداروں پرحملہ کریں گے تو پھر گلہ نہ کریں، بلاول بھٹو نے کہا کہ پی ٹی آئی سیاست کو سیاسی دائر ے کے اندر لے کر آئے، نئے الیکشن سے پہلے انتخابی اصلاحات کرنی ہوں گی، الیکشن کا ایسا سسٹم ہو جس پر تمام سیاسی جماعتوں کو اعتماد ہو۔

بلاول بھٹو کا کہنا تھا کہ قبل از وقت الیکشن کی بات نہیں کر رہا،کبھی تو الیکشن ہوں گے، آج نہیں تو کل سیاسی رویہ اپنانا ہوگا، ورنہ نقصان ہوگا، انہوں نے کہا کہ دیوار پر لکھا ہے الیکشن جلد نہیں ہوں گے۔