کوہاٹ(روشن پاکستان نیوز) وزیر اعلیٰ خیبر پختونخوا سہیل آفریدی نے کہا ہے کہ ملک میں جلد ہی صرف بانی پی ٹی آئی کی حکومت ہو گی۔
وزیر اعلیٰ خیبر پختونخوا سہیل آفریدی نے کوہاٹ میں جلسے سے خطاب کرتے ہوئے کہا کہ جب بھی بانی پی ٹی آئی عمران خان کی کال آئے گی ہم نکل پڑیں گے۔ صوبے میں کرپٹ عناصر کا خاتمہ کریں گے۔ اور ملک میں جلد ہی صرف بانی پی ٹی آئی کی حکومت ہو گی۔
انہوں نے کہا کہ خیبر پختونخوا کی طرف انگلی اٹھانے والے پہلے اپنی صوبے کی کرپشن دیکھیں۔ پنچاب میں ہزاروں اربوں روپے کی کرپشن ہو رہی ہے۔ اس بار ڈی چوک جائیں گے تو آزادی لے کر یا کفن میں واپس آئیں گے۔
سہیل آفریدی نے کہا کہ بانی پی ٹی آئی اور ان کی بہنوں کو جعلی مقدموں میں پھنسایا ہوا ہے۔ تاہم ہم بانی پی ٹی آئی کو آزاد کرائیں گے۔ انہیں دبانے کی کوشش کی جا رہی ہے۔ جج سے ملنے جاتے ہیں تو ہمیں ملنے نہیں دیا جاتا۔
انہوں نے کہا کہ جنہوں نے ہمارے مینڈیٹ کی حفاظت کرنی تھی انہوں ڈاکہ ڈالا ہوا ہے۔ اور ہمارے محافظ ہی ہمارے قاتل بنے ہوئے ہیں۔
وزیر اعلیٰ خیبر پختونخوا نے کہا کہ کچھ ٹاؤٹس رات کو میڈیا پر بیٹھ کر گولیوں کی دھمکی دیتے ہیں۔ جبکہ بانی پی ٹی آئی نے احتجاج یا مذاکرات کی ذمہ داری محمود اچکزئی اور علامہ ناصر عباس کو دی ہے، جب بھی انکی طرف سے کال آئے گی سب نے تیار رہنا ہے۔
یہ بھی پڑھیں: عمران خان کا بنایا گیامجسمہ سوشل میڈیا پر وائرل، صارفین کے دلچسپ تبصرے
انہوں نے کہا کہ پنجاب پولیس کو پورے پاکستان میں کرپٹ ترین ادارہ بنا دیا گیا ہے۔ خیبر پختونخوا میں سرمایہ کاری ہو رہی ہے۔ اور پنجاب میں سرمایہ کاری کم ہو گئی ہے۔ جبکہ یہ مشورے بھی ہمیں دیئے جا رہے ہیں۔
