گوجرانوالہ(روشن پاکستان نیوز) وزیراعلیٰ مریم نواز نے کہا ہے کہ معرکہ حق میں کامیابی سے لیکر مہنگائی میں کمی تک ہر شعبے پر شہباز شریف کی مہر ہے۔
گوجرانوالہ میں ماس ٹرانزٹ سسٹم کے سنگ بنیاد رکھنے کی تقریب سے وزیراعلیٰ پنجاب مریم نواز نے خطاب کرتے ہوئے کہا کہ نوا زشریف کی میراث آج پنجاب میں جاری ہے، گوجرانوالہ میں ماس ٹرانزٹ کا کام آج شروع ہو رہا ہے۔
وزیراعلیٰ پنجاب نے کہا کہ وزیراعظم کا شکریہ کہ انہوں نے گوجرانوالہ آنے کیلئے وقت نکالا، انہوں نے کہا کہ نواز شریف کے ویژن سے سیکھ کر ترقیاتی منصوبے شروع کیے، چند دنوں میں فیصل آباد میں میٹرو منصوبے کا آغاز کیا جائے گا۔
پنجاب کے ہر ترقیاتی منصوبے پر نواز شریف اور شہباز شریف کی مہر ہے، پنجاب میں انفرا سٹرکچر، صحت، تعلیم اور ترقیاتی منصوبے جاری ہیں، وزیراعلیٰ نے کہا کہ پاکستان کی معیشت ڈیفالٹ کے خطرے سے نکل کر مستحکم ہو رہی ہے، ڈیفالٹ کی خواہش کرنے والوں کو منہ کی کھانا پڑی۔
وزیراعلیٰ پنجاب مریم نواز نے کہا کہ 40 فیصد مہنگائی سے 4 فیصد تک کمی آئی ہے، پنجاب میں سی پیک، میٹر و بس، اورنج لائن، تعلیم و ٹیکنالوجی میں ترقی ہو رہی ہے، انہوں نے کہا کہ معرکہ حق میں کامیابی سے لیکر مہنگائی میں کمی تک ہر شعبے پر شہباز شریف کی مہر ہے۔
مریم نواز نے کہا کہ میانوالی اور گجرات میں بنیادی ترقیاتی منصوبے جاری ہیں، میانوالی اور گجرات آج ترقی کی جانب گامزن ہیں، انہوں نے کہا کہ بارش کے پانی کے مسائل حل، سڑکیں اور گرین لائن منصوبے جاری ہیں، ستھرا پنجاب، ماڈل ویلجز اور سیوریج منصوبے پنجاب بھر میں جاری ہیں۔
وزیراعلیٰ پنجاب نے کہا کہ خیبر پختونخوا میں 12سال سے برسراقتدار حکومت کی کارکردگی صفر ہے، خیبر پختونخوا کی عوام نے جھوٹ کی سیاست کو خیر آباد کہ کر ن لیگ کو ووٹ دیا، انہوں نے کہا کہ خیبر پختونخوا کا ایک وزیراعلیٰ وفاق اور پنجاب کی سرکاری مشینری پر حملہ آور ہوا۔
مریم نواز نے مشورہ دیتے ہوئے کہا کہ وزیراعلیٰ خیبر پختونخوا اڈیالہ کے باہر بیٹھنے کے بجائے صوبے کی ترقی پر توجہ دے، ہمیں اڈیالہ جیل کے باہر بیٹھنے کا نہیں، عوام کی خدمت کا مینڈیٹ ملا ہے۔
مزید پڑھیں: پنجاب حکومت نے پتنگ بازی کی اجازت دینے کا قانون جاری کر دیا
وزیراعلیٰ پنجاب مریم نوا ز نے کہا کہ پنجاب میں اپنی چھت اپنا گھر پروگرام کے تحت ایک لاکھ گھر زیر تعمیر ہیں، ہزاروں کی تعداد میں اپنا گھر منصوبے کے تحت گھر مکمل ہو رہے ہیں، ستھرا پنجاب دنیا کا سب سے بڑا منصوبہ بن چکا ہے، فوربز میگزین نے بھی ستھرا پنجاب پروگرام کی پذیرائی کی، ستھرا پنجاب پروگرام کے 50 ہزار ٹن کوڑا اٹھا چکے ہیں، پر ضلع میں ستھرا پنجاب کی ٹیم کے پاس اپنی مشینری موجود ہے۔
وزیراعلیٰ پنجاب نے کہا کہ پنجاب بھر میں سیوریج کا نیا نظام لا رہے ہیں، پنجاب میں پینے کے صاف پانی کے منصوبے بھی جاری ہیں، سیکڑوں ماڈل ویلجز پر بھی کام جاری ہے، انہوں نے کہا کہ ایک سال میں پنجاب بھر میں 20 ہزار کلو میٹر سڑکیں بنا چکے ہیں، 2 سال میں 30 ہزار کلومیٹر سڑکیں بنا لیں گے۔
مریم نواز نے کہا کہ پنجاب بھر میں مزدوروں کیلئے راشن کارڈ جاری کیے ہیں، طلبہ کو 80ہزار اسکالز شپ اور ایک لاکھ لیپ ٹاپ دے چکے ہیں، تمام سرکاری اسکولوں میں تمام تر بنیادی ضروریات پوری کر رہے ہیں، انہوں نے کہا کہ طلبہ کو اے آئی اور روبوٹکس کی تعلیم بھی دی جا رہی ہے۔
وزیراعلیٰ پنجاب مریم نواز نے کہا کہ پنجاب میں ایک ہزار فیلڈ اسپتال 2کروڑ عوام کو گھر کی دہلیز پر علاج فراہم کر رہے ہیں، پنجاب میں صحت کے اسٹیٹ آف دی آرٹ منصوبوں پر کام ہو رہا ہے۔
