لاہور(روشن پاکستان نیوز) وزیر اعلیٰ پنجاب مریم نواز نے لاہور ڈویلپمنٹ پلان کے دوسرے فیز کا باقاعدہ آغاز کر دیا۔
وزیر اعلیٰ مریم نواز کی زیر صدارت لاہور ڈویلپمنٹ فیز ٹو سے متعلق اجلاس منعقد ہوا۔ جس میں تفصیلی بریفنگ دی گئی اور وزیر اعلیٰ کی طرف سے ضروری ہدایات جاری کی گئیں۔
وزیر اعلیٰ آفس کے مطابق لاہور شہر میں ترقی کا نیا دور شروع ہوگیا۔ جس میں لاہور شہر کی 6 ہزار 284 گلیوں کی مکمل اپ گریڈیشن کی جائے گی۔ واسا کی 486 اور لاہور میونسپل کارپوریشن کی 5 ہزار 798 گلیوں کو آئندہ سال جون تک جدید اور قابل فخر بنایا جائے گا۔
وزیراعلیٰ آفس کا کہنا ہے کہ لاہور کا ہر محلہ روشن اور آباد بنانے کے لیے اجلاس میں مرحلہ وار ماہانہ ورک پلان پیش کیا گیا۔
مریم نواز نے واضح ہدایت کی کہ لاہور کی ترقی میں معیار پر کوئی سمجھوتہ نہیں ہو گا۔ اور نہ ہی لاہور ڈویلپمنٹ پلان فیز ٹو کی تکمیل میں کسی قسم کی تاخیر برداشت کی جائے گی۔
یہ بھی پڑھیں: پی ٹی آئی دور میں خیبرپختونخوا پتھروں کے دور میں چلا گیا، مریم نواز
وزیر اعلیٰ پنجاب مریم نواز نے کہا کہ لاہور کے ہر کونے کو اب ٹوٹ پھوٹ سے آزاد اور شہریوں کے لیے باعزت بنایا جائے گا۔ 6 ہزار سے زائد گلیوں کی اپ گریڈیشن کے ساتھ لاہور کا ہر محلہ رہائش کے لیے فخر کی علامت بنے گا۔
