لاہور (روشن پاکستان نیوز) پنجاب پولیس میں افسران کی ترقیوں کا سلسلہ بلا تعطل جاری ہے۔ ترجمان پنجاب پولیس کے مطابق سب انسپکٹرز کو انسپکٹر کے عہدے پر ترقی دینے کے لیے دو روزہ پروموشن بورڈ کا اجلاس شروع ہو گیا ہے۔
ایڈیشنل آئی جی پنجاب سلطان احمد چوہدری اجلاس کی صدارت کر رہے ہیں جبکہ ڈی آئی جی ہیڈ کوارٹرز محمد عابد خان، ڈی آئی جی اسٹیبلشمنٹ ون سلیمان سلطان رانا، ڈی آئی جی اسٹیبلشمنٹ ٹو لیاقت علی ملک، اے آئی جی ڈسپلن اور اے آئی جی لیگل سمیت دیگر متعلقہ افسران بھی اجلاس میں شریک ہیں۔
ترجمان کے مطابق پروموشن بورڈ میں سب انسپکٹرز سے انسپکٹر کے عہدے پر ترقی کے لیے 900 سے زائد کیسز زیرِ غور لائے جا رہے ہیں۔ میرٹ اور قواعد و ضوابط پر پورا اترنے والے افسران کو اگلے عہدے پر ترقی دی جائے گی۔
رواں سال اب تک سب انسپکٹر سے انسپکٹر کے عہدے پر ترقی کے لیے 5 پروموشن بورڈ منعقد کیے جا چکے ہیں، جن کے ذریعے 757 افسران کو ترقی دی گئی۔
ترجمان پنجاب پولیس کے مطابق گزشتہ اڑھائی سال کے دوران اس کیٹیگری میں 26 پروموشن بورڈ منعقد کیے گئے جن میں مجموعی طور پر 3167 افسران کو انسپکٹر کے عہدے پر ترقی دی گئی۔
