اسلام آباد(روشن پاکستان نیوز) چیف ایڈوائزر بنگلہ دیش کے معاون خصوصی (خزانہ) انیس الزماں چوہدری نے وزیر مملکت خزانہ و ریلوے بلال اظہر کیانی سے وزارت خزانہ میں ملاقات کی۔
ملاقات میں دونوں رہنماؤں نے پاکستان اور بنگلہ دیش کے درمیان اقتصادی تعاون کے نئے مواقع تلاش کرنے اور مشترکہ ترقی کے اہداف کے لیے شراکت داری کو تیز کرنے پر تبادلہ خیال کیا۔
راہنماؤں نے دوطرفہ تجارت میں اضافہ، توانائی، ٹرانسپورٹ اور دیگر اقتصادی شعبوں میں تعاون کو فروغ دینے کے ساتھ عوامی سطح پر رابطوں کو بہتر بنانے کے لیے براہ راست پروازوں کی بحالی کے امور پر بھی بات چیت کی۔
مزید پڑھیں: وزیر مملکت خزانہ و ریلوے سے جرمن سفیر کی ملاقات، دوطرفہ تعلقات اور اقتصادی تعاون پر تبادلہ خیال
دونوں فریقین نے پاکستان اور بنگلہ دیش کے درمیان قریبی اقتصادی اور سفارتی تعلقات کو مزید مستحکم بنانے کے عزم کی تصدیق کی۔
ملاقات میں پاکستان میں بنگلہ دیش کے سفیر محمد اقبال حسین خان، قونصلر (پریس) محمد طیب علی، ہیڈ آف چانسری عصرت جہاں اور وزارت خزانہ کے اکنامک ایڈوائزر ڈاکٹر حسن محمد محسن بھی موجود تھے۔
