اسلام آباد(روشن پاکستان نیوز) ڈائریکٹوریٹ جنرل آف امیگریشن اینڈ پاسپورٹس نے پاکستانی پاسپورٹ کے حوالے سے سوشل میڈیا پر گردش کرنے والی خبروں اور تصاویر کو بے بنیاد اور جعلی قرار دیا ہے۔
محکمہ پاسپورٹس کے مطابق پاسپورٹ کے فرنٹ کور پیج میں کسی قسم کی تبدیلی نہیں کی گئی۔ بیان میں کہا گیا کہ سوشل میڈیا پر زیرِ گردش تصاویر جعلی ہیں اور عوام کو گمراہ کرنے کے لیے پھیلائی جا رہی ہیں۔
محکمہ نے شہریوں سے اپیل کی ہے کہ ذمہ داری کا مظاہرہ کریں اور ایسی جھوٹی خبروں پر دھیان نہ دیں۔
مزید پڑھیں: پاکستانی پاسپورٹ کا ڈیزائن مکمل طور پر تبدیل کرنے کا فیصلہ
ترجمان کے مطابق قومی پاسپورٹ میں صرف کچھ سکیورٹی فیچرز میں بہتری کی گئی ہے، تاہم ڈیزائن یا فرنٹ کور پیج میں کوئی تبدیلی نہیں کی گئی۔
محکمہ پاسپورٹس نے واضح کیا کہ قومی دستاویز سے متعلق منفی پروپیگنڈہ پھیلانے والوں کے خلاف قانونی کارروائی کی جائے گی۔
دوسری طرف سینئر صحافی حامد میر نے بھی اپنی ٹوئٹ میں لکھا ہے کہ سوشل میڈیا پر پاکستان کے نئے پاسپورٹ کے بارے میں ایک افواہ گردش کر رہی ہے کہ اس پر “اسلامی جمہوریہ” کا لفظ موجود نہیں۔ میں نے متعلقہ حکام سے تصدیق کی ہے، جنہوں نے اس دعوے کی تردید کی ہے۔ سوشل میڈیا پر شیئر کی گئی یہ نئی تصویر جعلی اور من گھڑت ہے۔
اس سے قبل خبر آئی تھی کہ حکومت پاکستان نے پاسپورٹ ڈیزائن مکمل طور پر تبدیل کرنے کا فیصلہ کیا ہے۔
