اسلام آباد(عرفان حیدر) ادارے نے منشیات کی اسمگلنگ روکنے کے لیے ملک بھر میں موثر کارروائیاں شروع کر دی ہیں۔ سات مختلف کارروائیوں کے دوران اے این ایف نے مجموعی طور پر 1 کروڑ 85 لاکھ روپے سے زائد مالیت کی 205.291 کلوگرام منشیات برآمد کیں اور چھ ملزمان کو گرفتار کیا۔
علامہ اقبال ائیرپورٹ پر عمرہ کی ادائیگی کے لیے جدہ جانے والے دو مسافروں کے پیٹ سے ہیروئن بھرے کیپسولز برآمد ہوئے۔ پہلی کارروائی میں 0.562 کلوگرام ہیروئن اور 0.219 کلوگرام وزنی آئس بھرے 94 کیپسولز، جبکہ دوسری کارروائی میں 0.442 کلوگرام وزنی 73 ہیروئن بھرے کیپسولز برآمد ہوئے۔
چکلالہ گیریژن راولپنڈی میں برطانیہ سے آنیوالے پارسل سے 68 گرام ویڈ بھی برآمد ہوئی۔ کالا شاہ کاکو ٹول پلازہ کے قریب ایک گاڑی سے 120 کلوگرام چرس اور 30 کلوگرام افیون برآمد کر کے ملزم کو گرفتار کیا گیا۔
مزید پڑھیں: اسلام آباد ایئرپورٹ پر اے این ایف کی بڑی کارروائی، بین الاقوامی منشیات اسمگلر گرفتار
کوئٹہ کے قریب باچا آغا بازار بالیلی سے 30 کلوگرام چرس، بنوں کوہاٹ روڈ پنڈی پل کے قریب 14.4 کلوگرام چرس اور 3.6 کلوگرام افیون، جبکہ کراچی کے قریب رئیس گوٹھ حب روڈ سے 6 کلوگرام چرس بھی برآمد ہوئی ہے۔
تمام ملزمان کے خلاف انسداد منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔ اے این ایف کا کہنا ہے کہ منشیات کے خاتمے کے لیے کارروائیاں جاری رہیں گی۔
