اسلام آباد(روشن پاکستان نیوز) پیپلز پارٹی کے رہنما ندیم افضل چن نے  دعویٰ کیا ہے کہ میری خبر کے مطابق سہیل آفریدی وزیراعلیٰ خیبرپختونخوا نہیں بنیں گے،کل تک فیصلہ ہوجائےگا وزیراعلیٰ کون بنےگا۔

اپنے ایک بیان میں انہوں نے کہا کہ اپوزیشن اپنا نمائندہ ضرور لائےگی،کوئی سرپرائز ہوسکتاہے،خیبرپختونخوا کے لیے 2روز بہت اہم ہیں۔

نئے وزیر اعلیٰ خیبر پختونخوا کا انتخاب کیسے ہو گا؟

علی امین گنڈاپور نے وزیر اعلیٰ کے عہدے سے استعفیٰ دینے کا اعلان کر دیا اور وہ کل بروز جمعرات کو اپنا استعفیٰ گورنر کو ارسال کریں گے۔جس کے بعد گورنر استعفیٰ کی سمری پر 48 گھنٹوں میں دستخط کر کے استعفیٰ کی منظوری دیں گے۔

وزیر اعلیٰ کا استعفیٰ منظور ہونے کے بعد خیبر پختونخوا کی کابینہ بھی تحلیل ہو جائے گی۔استعفیٰ کی منظوری کے بعد پارلیمانی پارٹی کے اجلاس میں نئے وزیر اعلیٰ کی نامزدگی کی توثیق کی جائے گی۔

مزید پڑھیں: پیپلز پارٹی کی رکن قومی اسمبلی سحر کامران کی برطانوی ہائی کمیشن کی استقبالیہ تقریب میں شرکت

نامزد وزیر اعلیٰ کے انتخاب کے لیے اسپیکر کی جانب سے اسمبلی اجلاس طلب کیا جائے گا۔ اور پھر اسمبلی اجلاس میں ووٹنگ کے ذریعے نامزد وزیر اعلیٰ کو اپنی اکثریت ثابت کرنا ہو گی۔

خیبر پختونخوا اسمبلی میں اراکین کی کل  تعداد 145 ہے۔ اور اکثریت کے لیے 73 ارکان کی حمایت درکار ہو گی۔ اس وقت پاکستان تحریک انصاف (پی ٹی آئی) کو 90 سے زائد اراکین کی اکثریت حاصل ہے۔