اسلام آباد(روشن پاکستان نیوز) الیکشن کمیشن نے پنجاب میں بلدیاتی انتخابات میں تاخیر سے متعلق درخواستوں پر محفوظ فیصلہ سناتے ہوئے کہا ہے کہ پنجاب میں دسمبر میں انتخابات ہونگے۔
الیکشن کمیشن کے فیصلے میں کہا گیا ہے کہ پنجاب میں بلدیاتی انتخابات دسمبر کے آخری ہفتے میں ہوں گے، الیکشن کمیشن 2022 کے قانون کے تحت پنجاب میں بلدیاتی انتخابات کرائے گا۔
بلدیاتی الیکشن سے متعلق فیصلہ چیف الیکشن کمشنر سکندر سلطان راجہ، ممبران نثار درانی، شاہ محمد جتوئی اور بابر حسن بھروانہ نے جاری کرتے ہوئے پنجاب میں کل سے حلقہ بندیوں کا آغاز کرنے کی ہدایت کر دی۔
مزید پڑھیں: بلیو ایریا اسلام آباد میں نو سال بعد الیکشن، تاجر اتحاد گروپ کی قیادت میں شفاف انتخاب کا اعلان
سماعت کے دوران چیف الیکشن کمشنر اور کمیشن کے دیگر ممبران کو بتایا گیا کہ پنجاب کے بلدیاتی قوانین میں 5 مرتبہ ترامیم کی جا چکی ہیں اور اب چھٹی مرتبہ بھی ترمیم کی جا رہی ہے تاہم الیکشن ایکٹ 2022 کے تحت الیکشن کروائے جا سکتے ہیں۔
الیکشن کمیشن کا کہنا تھا کہ پنجاب حکومت کا طرزِ عمل تاخیری اور آئینی ذمہ داریوں کے منافی ہے، پنجاب کے بلدیاتی انتخابات موجودہ قانون کے تحت ہوں گے۔
یاد رہے کہ چند روز قبل جماعت اسلامی کی درخواست پر لاہور ہائیکورٹ نے پنجاب میں بلدیاتی انتخابات نہ کروانے پر ایڈووکیٹ جنرل اور چیف سیکرٹری پنجاب کو طلب کیا تھا۔
