اسلام آباد (روشن پاکستان نیوز) پاکستان پیپلز پارٹی کی رکن قومی اسمبلی سحر کامران نے انسٹیٹیوٹ آف ریجنیشنل اسٹڈیز (IRS) کی حالیہ رپورٹ “جنوبی ایشیا میں امن کی تعمیر: بعد از پاہلگام منظرنامہ” پر اپنے اہم تبصرے میں بھارت کی انتہاپسندانہ اور جارحانہ پالیسیوں کو خطے کے امن کے لیے سب سے بڑا خطرہ قرار دیا ہے۔
ٹوئٹر (ایکس) پر اپنے بیان میں سحر کامران نے کہا کہ بھارت کی ہندوتوا ایجنڈا اور مقبوضہ کشمیر میں انسانی حقوق کی خلاف ورزیاں نہ صرف کشمیری عوام کے بنیادی حقوق سلب کر رہی ہیں بلکہ خطے میں تناؤ اور عدم استحکام کو بھی جنم دے رہی ہیں۔ انہوں نے زور دے کر کہا کہ پاکستان نے ہمیشہ امن، مذاکرات اور باہمی احترام کی پالیسی اپنائی ہے جو خطے کے دیرپا امن کے لیے ناگزیر ہے۔
سحر کامران نے عالمی برادری پر زور دیا کہ وہ بھارت کے غیر ذمہ دارانہ اقدامات کا سخت نوٹس لے اور کشمیری عوام کو ان کا جائز حق خودارادیت فراہم کرنے کے لیے اپنا کردار ادا کرے تاکہ خطے میں امن و استحکام قائم ہو سکے۔
انہوں نے IRS کی رپورٹ کو علاقائی صورتِ حال کا جامع اور حقیقت پسندانہ جائزہ قرار دیتے ہوئے کہا کہ اس رپورٹ میں پیش کی گئی تجاویز ہی خطے میں امن کے قیام کی کنجی ہیں، جس میں تمام فریقین کو برابری کی بنیاد پر بات کرنے کا موقع دیا جانا چاہیے۔
سحر کامران کے یہ مؤقف نہ صرف پاکستان کے جمہوری اصولوں کی عکاسی کرتا ہے بلکہ عالمی سطح پر کشمیریوں کے حقوق کے تحفظ اور جنوبی ایشیا میں پائیدار امن کے قیام کی جانب ایک مثبت قدم بھی ہے۔
