اسلام آباد(عرفان حیدر) وزیرِ مملکت برائے خزانہ و ریلوے بلال اظہر کیانی سےمیتسو کمپنی فن لینڈ کی صدر معدنیات پیا کارہو نے ملاقات کی۔
ملاقات میں پاکستان کے معدنی شعبے میں سرمایہ کاری کے امکانات پر تبادلہ خیال کیا گیا۔ پیا کارہو نے بتایا کہ میتسو کمپنی جدید کان کنی کی ٹیکنالوجی اور سامان فراہم کرے گی، اور ساتھ ہی مقامی افرادی قوت کو تربیت بھی فراہم کی جائے گی۔ انہوں نے کمپنی کے مستقبل کے منصوبوں پر روشنی ڈالتے ہوئے کہا کہ میتسو ریکوڈک منصوبے میں کان کنی کی ٹیکنالوجی اور خدمات فراہم کر کے شرکت کا ارادہ رکھتی ہے۔
وزیرِ مملکت بلال اظہر کیانی نے ریکوڈک منصوبے کی بروقت تکمیل کے لیے ML-1 اور ML-3 ریلوے لائنوں کی بہتری پر جاری پیش رفت اور آئندہ کے منصوبوں کا ذکر کیا، جن کا ہدف دسمبر 2028 تک مکمل اور فعال ہونا ہے۔ انہوں نے ملکی معاشی سرگرمیوں میں میتسو کی آئندہ شمولیت کا خیر مقدم کیا۔
ملاقات کے اختتام پر دونوں فریقین نے سرمایہ کاری اور مزید تعاون کے امکانات کو آگے بڑھانے کے لیے وزارتِ ریلوے کے تکنیکی ماہرین کے ساتھ ایک فالو اَپ اجلاس منعقد کرنے پر اتفاق کیا۔
مزید پڑھیں: عالمی ٹرانسپورٹ نمائش و کانفرنس کل سے ابوظہبی میں شروع، پاکستان کی نمائندگی بلال اظہر کیانی کریں گے
