اسلام آباد (روشن پاکستان نیوز) — نیشنل پریس کلب اسلام آباد کے صدر اظہر جتوئی، قائم مقام صدر احتشام الحق، سیکرٹری نیئر علی اور فنانس سیکرٹری وقار عباسی نے سینئر صحافی اعجاز احمد کے خلاف پاکستان تحریک انصاف (پی ٹی آئی) کے بانی چیئرمین عمران خان کے نامناسب رویے اور کارکنان کی جانب سے دی جانے والی دھمکیوں پر شدید تشویش اور افسوس کا اظہار کیا ہے۔
نیشنل پریس کلب کی منتخب قیادت نے اپنے مذمتی بیان میں اس واقعے کو آزادی اظہار رائے پر حملہ قرار دیتے ہوئے کہا ہے کہ کسی صحافی کی رائے یا رپورٹنگ سے اختلاف کا ہرگز یہ مطلب نہیں کہ سیاسی قیادت یا ان کے کارکنان اخلاقی حدود کو پامال کرتے ہوئے میڈیا کو نشانہ بنائیں۔
قیادت نے مطالبہ کیا کہ عمران خان فوری طور پر سینئر صحافی اعجاز احمد سے معذرت کریں اور پی ٹی آئی کی قیادت اپنے کارکنان کو واضح ہدایات جاری کرے کہ وہ صحافیوں کو ہراساں کرنے یا سوشل میڈیا پر نشانہ بنانے سے باز رہیں۔
مزید پڑھیں: نیشنل پریس کلب اسلام آباد میں جشنِ آزادی کی پروقار تقریب کا انعقاد
بیان میں خبردار کیا گیا کہ اگر معذرت نہ کی گئی اور ہراسانی کا سلسلہ جاری رہا تو نیشنل پریس کلب پی ٹی آئی کی تمام پریس کانفرنسز کا واک آؤٹ، بائیکاٹ اور دیگر احتجاجی اقدامات کا آغاز کرے گا۔
نیشنل پریس کلب کی قیادت نے واضح کیا کہ صحافی برادری اپنی آزادی، عزت اور وقار پر کسی قسم کا سمجھوتہ نہیں کرے گی۔
