راولپنڈی (عرفان حیدر سے): بحرین کے وزیر داخلہ لیفٹیننٹ جنرل راشد بن عبداللہ الخلیفہ نے 10 رکنی اعلیٰ سطحی وفد کے ہمراہ اینٹی نارکوٹکس فورس (اے این ایف) کے ہیڈکوارٹر راولپنڈی کا دورہ کیا۔ اس موقع پر وزارتِ داخلہ و نارکوٹکس کنٹرول کے سیکرٹری کیپٹن (ریٹائرڈ) خرم آغا اور انسپکٹر جنرل پولیس اسلام آباد، سید علی ناصر رضوی بھی موجود تھے۔
ڈائریکٹر جنرل اے این ایف، میجر جنرل عبد المعید (ہلال امتیاز – ملٹری) نے سینئر اسٹاف افسران کے ہمراہ معزز مہمانوں کا پرتپاک استقبال کیا۔ دورے کے دوران ڈی جی اے این ایف کی جانب سے بحرینی وزیر داخلہ کو منشیات کے خلاف جاری کوششوں، آپریشنل کامیابیوں، تربیتی اقدامات، اور منشیات کی طلب میں کمی سے متعلق پروگراموں پر تفصیلی بریفنگ دی گئی۔
ڈی جی اے این ایف نے بریفنگ میں بتایا کہ فورس محدود وسائل اور کم افرادی قوت کے باوجود ملکی و بین الاقوامی سطح پر منشیات کی اسمگلنگ کے خلاف مؤثر کردار ادا کر رہی ہے۔
مزید پڑھیں: کراچی: اے این ایف کی بڑی کارروائی، آسٹریلیا اسمگل کی جانے والی آئس کی بھاری مقدار ضبط
بحرینی وزیر داخلہ نے اے این ایف کی پیشہ ورانہ کارکردگی اور انسداد منشیات کے لیے جاری کاوشوں کو سراہتے ہوئے کہا کہ بحرین، پاکستان کے ساتھ دو طرفہ تعاون کو مزید فروغ دینا چاہتا ہے۔ انہوں نے خلیج تعاون کونسل (GCC) کے ممالک کے مابین منشیات کی اسمگلنگ کی روک تھام کے لیے اے این ایف کے حالیہ اقدامات کو سراہتے ہوئے مستقبل میں اس تعاون کو مزید مضبوط بنانے کی یقین دہانی کروائی۔
لیفٹیننٹ جنرل راشد بن عبداللہ الخلیفہ نے پاکستان کے ساتھ برادرانہ تعلقات کو خصوصی اہمیت دینے پر زور دیا اور کہا کہ بحرین منشیات کے خلاف جنگ میں خصوصاً تربیتی شعبے میں پاکستان کے ساتھ تعاون کو مزید وسعت دینا چاہتا ہے۔
