اسلام آباد(روشن پاکستان نیوز) محکمہ موسمیات نے ملک کے بیشترعلاقوں میں ایک بار پھر بارشوں کا امکان ظاہر کیا ہے۔

اسلام آباد، راولپنڈی سمیت پنجاب کے مختلف اضلاع میں بارش ہوگی جب کہ دیر، سوات اورمانسہرہ میں موسلادھاربارش کا امکان ہے۔ اس کے علاوہ سانگھڑ، گھوٹکی، تھرپارکر،عمرکوٹ، ژوب، موسیٰ خیل اور بارکھان میں بھی بادل برسیں گے۔

کشمیر اور گلگت بلتستان میں مطلع جزوی ابرآلود ہے اور بارش کا امکان ہے۔ پہاڑی علاقوں مری، گلیات اور کشمیر میں لینڈ سلائیڈنگ ہوگی جب کہ بارش کے باعث ندی نالوں میں طغیانی اورنشیبی علاقے زیرآب آنے کا خدشہ ہے۔

آزاد کشمیر میں موسلا دھار بارشوں کا الرٹ جاری

نیشنل ڈیزاسٹر مینجمنٹ اتھارٹی (این ڈی ایم اے) نے آزاد کشمیر کے مختلف علاقوں میں آئندہ 12 سے 24 گھنٹوں میں موسلا دھار بارشوں اور سیلاب کا الرٹ جاری کردیا ہے۔

این ڈی ایم اے کے مطابق وادی نیلم، مظفرآباد، باغ، حویلی اور کوٹلی میں شدید بارش کا امکان ہے، جس سے شہری اور نشیبی علاقوں میں سیلاب جبکہ پہاڑی علاقوں میں لینڈ سلائیڈنگ کا خدشہ ہے۔

مزید پڑھیں: پنجاب میں سیلاب سے صورتحال سنگین، 2200 دیہات زیر آب، 20 لاکھ افراد متاثر، اموات 33 ہوگئیں

این ڈی ایم اے کی جانب سے ندی نالوں کے قریب رہائشیوں کو الرٹ رہنے کی ہدایت کردی گئی ہے جب کہ شہریوں کو غیرضروری سفر سے گریز کا بھی کہا گیا ہے۔