بیجنگ(روشن پاکستان نیوز) فیلڈ مارشل سید عاصم منیر نے کہا ہے کہ پاک چین اسٹریٹجک شراکت داری چٹان کی طرح مضبوط ہے۔
چینی وزیر خارجہ نے فیلڈ مارشل سید عاصم منیر سے ملاقات کی۔ اس موقع پر فیلڈ مارشل سید عاصم منیر نے گفتگو کرتے ہوئے کہا کہ چین پاکستان کا آہنی دوست ہے۔ اور دونوں ممالک ہمیشہ ایک دوسرے کے دکھ سکھ میں شریک رہے۔
انہوں نے کہا کہ پاک چین اسٹریٹجک شراکت داری چٹان کی طرح مضبوط ہے۔ اور چین کے ساتھ دوستانہ تعلقات قائم رکھنا پاکستانی قوم کا متفقہ مؤقف ہے۔
فیلڈ مارشل نے پاکستان کی معاشی اور سماجی ترقی میں تعاون پر چینی قیادت سے اظہار تشکر کرتے ہوئے کہا کہ پاکستانی فوج انسداد دہشتگردی اور سیکیورٹی تعاون کو فروغ دینے کے لیے تیار ہے۔
انہوں نے کہا کہ چینی اہلکاروں، منصوبوں اور اداروں کی حفاظت یقینی بنانے کی کوشش جاری رہے گی۔ جبکہ پاک چین دوستی کو مزید مستحکم بنانے کے لیے اقدامات اور ترقی کی راہ پر سفر جاری رکھا جائے گا۔
یہ بھی پڑھیں: پاکستان امریکا کیساتھ دیرینہ شراکت داری کو مزید گہرا کرنا چاہتا ہے، آرمی چیف
چینی وزیر خارجہ وانگ ژی نے کہا کہ پاکستانی فوج قومی استحکام کا ستون اور پاک چین دوستی کی مضبوط محافظ ہے۔ پاکستانی فوج نے دونوں ممالک کی قیادت کے درمیان اتفاق رائے پر عملدرآمد کی حمایت کی۔ اور مضبوط پاک چین تعلقات کو فروغ دینا علاقائی امن و استحکام کے لیے سودمند ہے۔
انہوں نے کہا کہ چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔ اور وقت کے کڑے امتحانات کے باوجود پاک چین تعلقات مزید مضبوط ہوئے۔ دونوں ممالک ایک مضبوط روایتی دوستی قائم کر چکے ہیں۔
وانگ ژی نے کہا کہ چین پاکستان کی علاقائی سالمیت اور قومی سلامتی کے تحفظ میں تعاون جاری رکھے گا۔ اور چین عالمی امور میں پاکستان کے بڑے کردار کا خیرمقدم کرتا ہے۔
