اسلام آباد(روشن پاکستان نیوز) نیشنل ڈیزاسٹر مینجمنٹ اتھارٹی(این ڈی ایم اے ) نے ملک کے بیشتر علاقوں کیلئے شدید بارشوں اور سیلاب کا الرٹ جاری کردیا جس میں پنجاب، خیبر پختونخوا اور بلوچستان کے متعدد علاقوں میں سیلابی صورتحال کا خدشہ ظاہر کیا گیا ہے ۔
رپورٹ کے مطابق چترال، دیر، سوات، کالام، بٹگرام، ایبٹ آباد اورہری پور میں شدید بارش متوقع ہے،پہاڑی علاقوں میں لینڈ سلائیڈنگ اور اچانک سیلابی صورتحال کا خدشہ ہے۔
مردان، صوابی، پشاور، چارسدہ، نوشہرہ، کوہاٹ اورہنگو میں سیلابی صورتحال کا امکان ہے ،بنوں، لکی مروت ، ڈی آئی خان میں سیلاب اور برساتی نالوں میں طغیانی کا خدشہ ہے۔وزیرستان، کرم اورباجوڑ کے نشیبی علاقوں میں سیلاب اور برساتی نالوں میں طغیانی کا امکان ہے۔
اسی طرح اسلام آباد اور راولپنڈی میں ممکنہ شدید بارش کے باعث نشیبی علاقوں میں سیلاب کا خدشہ ہے،اٹک، جہلم اور چکوال میں ممکنہ شدید بارش کے باعث نشیبی علاقوں میں سیلاب کا امکان ہے،میانوالی، خوشاب اورسرگودھا میں شدید بارش اور تیز ہوائیں متوقع ہیں۔
فیصل آباد، منڈی بہاؤالدین اور گجرات میں سیلاب، ندی نالوں میں طغیانی متوقع ہے،گوجرانوالہ، سیالکوٹ، حافظ آباد، نارووال میں موسلادھار بارش، سیلابی صورتحال کا خدشہ ہے،لاہور، قصوراور اوکاڑہ میں متوقع بارش کے باعث شہری علاقوں میں سیلابی صورتحال کا امکان ہے ۔
رپورٹ میں مزید کہا گیا ہے کہ دریائے جہلم کے بالائی علاقوں بشمول جہلم، پونچھ، مظفرآباد اور کانچی میں شدید بارشیں متوقع ہیں،شدید بارشوں کے باعث دریائے راوی اور ستلج میں سیلابی صورتحال کا خدشہ ہے ۔
اسی طرح کوئٹہ، ژوب، زیارت، لورالائی، قلات اور نوشکی میں وقفے وقفے سے بارش کا امکان ہے،برکھان، سبی، ڈیرہ بگٹی، سوئی، خاران میں بھی بارش، شہری علاقوں میں سیلاب کا امکان ہے۔
پی ڈی ایم اے پنجاب کا الرٹ: خیبر پختونخوا اور بالائی علاقوں میں شدید بارشیں اور کلاؤڈ برسٹس متوقع
خضدار، آواران، واشک، تربت اور ہنگول میں شدیدبارش کا امکان ہے،خضدار، آواران، واشک، تربت، ہنگول میں پہاڑی ندی نالوں میں سیلابی صورتحال کا خدشہ ہے۔اورماڑہ، گڈانی میں شدیدبارش، ندی نالوں میں اچانک سیلابی صورتحال کا خدشہ ہے۔
این ڈی ایم اے نے ہدایت کی ہے کہ شہری غیر ضروری سفر سے گریز کریں، موسمی حالات سے آگاہ رہیں،گاڑیاں محفوظ جگہ پر پارک کریں،درختوں،سائن بورڈز اور کمزور تعمیرات سے دور رہیں۔
مقامی انتظامیہ اور این ڈی ایم اے کی ہدایات پر فوری عمل کریں،ممکنہ سیلابی صورتحال کے حوالے سے حساس علاقوں میں غیر ضروری سفر سے گریز کریں۔
تیز بہاؤ کی صورت میں ندی نالوں، پلوں اور پانی میں ڈوبی سڑکوں سے گزرنے سے گریزکریں۔
