اسلام آباد (روشن پاکستان نیوز) وزیراعلیٰ خیبر پختونخوا علی امین گنڈاپور نے کہا ہے کہ چیلنج ہے سیاسی اور جمہوری طریقے سے ہماری حکومت گرا کر دکھاؤ۔
سیشن کورٹس اسلام آباد میں پیشی کے موقع پر میڈیا سے گفتگو کرتے ہوئے علی امین گنڈاپور کا کہنا تھا کہ بانی پی ٹی آئی عمران خان کے ساتھ کھڑے ہیں اور کھڑے رہیں گے، 5 اگست کو ملک بھر سے لوگ احتجاج کیلئے نکلیں گے، بانی رہا ہوں گے۔
انہوں نے کہا کہ ہم مقدمات سے گھبرانے والے نہیں، میرے اوپر جھوٹے اور من گھڑت مقدمات بنائے گئے ہیں، ہم ہمیشہ سے اپنے آپ کو قانون کے سامنے پیش کرتے ہیں۔
انہوں نے کہا کہ میرے خلاف یہ کیس 2016 سے چل رہا ہے، میرے خلاف کیس میں کچھ بھی نہیں ، میرے اوپر اسلحہ اور بوتلیں ڈالی گئی ہیں، جب یہ کیس بنایا گیا میں نہ ہی وہاں موجود تھا نہ ہی وہ گاڑی میری تھی۔
علی امین نے مزید کہا کہ کے پی میں حکومت عمران خان کی امانت ہے، میں بار بار چیلنج کر رہا ہوں، ان کی اوقات ہی نہیں ہماری حکومت گرانے کی، ہماری جنگ حق کی ہے یہ جنگ ہم ہی جیتیں گے، 5 اگست کو اپنے صوبے میں احتجاج کی قیادت کروں گا۔
