اسلام آباد/کہوٹہ (روشن پاکستان نیوز) کہوٹہ پریس کلب کے صدر عمران ضمیر کے خلاف تھانہ کہوٹہ میں درج کیے گئے مبینہ جھوٹے اور بے بنیاد مقدمے پر پوٹھوہار یونین آف جرنلسٹس تحصیل اسلام آباد نے سخت احتجاج کرتے ہوئے اس اقدام کو آزادی صحافت پر حملہ قرار دیا ہے۔
یونین کے صدر اکرام الحق اور جنرل سیکرٹری حماد چوہدری نے اپنے مشترکہ مذمتی بیان میں کہا کہ پولیس کے ذریعے جھوٹے مقدمات کا اندراج حق و سچ کی آواز کو دبانے کی کوشش ہے۔ ان کا کہنا تھا کہ صدر پریس کلب کہوٹہ عمران ضمیر کو بااثر شخصیات کے اشارے پر اور پولیس کی ملی بھگت سے نشانہ بنایا گیا ہے، جو کہ ایک سوچے سمجھے منصوبے کا حصہ ہے۔
پوٹھوہار پریس کلب کے عہدیداران اور ممبران نے عمران ضمیر سے مکمل یکجہتی کا اظہار کرتے ہوئے واضح کیا کہ صحافیوں کو جھوٹے مقدمات میں ملوث کر کے ان کی آواز دبائی نہیں جا سکتی۔ انہوں نے مطالبہ کیا کہ وزیراعلیٰ پنجاب، آئی جی پنجاب، وزیر قانون، آر پی او راولپنڈی اور سی پی او راولپنڈی اس معاملے کا فوری نوٹس لیں اور بے بنیاد مقدمہ فی الفور خارج کیا جائے۔
یونین نے خبردار کیا کہ اگر مقدمہ ختم نہ کیا گیا تو راولپنڈی ڈویژن کے تمام اضلاع — بشمول راولپنڈی، مری، چکوال، جہلم، اٹک — اور وفاقی دارالحکومت اسلام آباد کے صحافی بھرپور احتجاج کریں گے۔
بیان کے آخر میں کہوٹہ پولیس سے مطالبہ کیا گیا کہ وہ اپنا رویہ درست کرے، صحافی کے خلاف درج جھوٹا مقدمہ فوری طور پر واپس لے اور صحافتی برادری میں پیدا ہونے والی بے چینی کا خاتمہ کرے۔
