اسلام آباد: پاکستان پیپلز پارٹی کی سینئر رہنما اور ماہر خارجہ امور سحر کامران نے پاکستان انٹرنیشنل ایئرلائن (PIA) کو برطانیہ کی ایئر سیفٹی لسٹ سے اخراج پر مبارکباد دی ہے۔ انہوں نے اس پیش رفت کو پاکستان کی ایوی ایشن صنعت کے لیے ایک بڑی کامیابی قرار دیا۔
سحر کامران نے کہا کہ برطانوی ایئر سیفٹی کمیٹی کی جانب سے پاکستانی ایئرلائنز پر عائد پابندی ہٹا لی گئی ہے، جس کے بعد اب پاکستانی کیریئرز برطانیہ میں آپریٹ کرنے کی درخواست دے سکیں گے۔
انہوں نے بتایا کہ پاکستان نے 2021 کے بعد اہم حفاظتی اقدامات کیے، جن کی روشنی میں برطانیہ نے یہ فیصلہ کیا۔ ان کا کہنا تھا کہ “الحمدللہ، 14 اگست 2025 سے پی آئی اے کی برطانیہ کے لیے پروازیں بحال ہو جائیں گی، جو کہ 16 لاکھ سے زائد برطانوی پاکستانیوں کے لیے ایک خوشخبری ہے۔”
سحر کامران کے مطابق اس پیش رفت سے پاکستان اور برطانیہ کے درمیان 4.7 ارب پاؤنڈ کا دو طرفہ تجارتی تعلق مزید فروغ پائے گا، اور سفری سہولیات دونوں ممالک کے درمیان تعلقات کو مضبوط کریں گی۔
انہوں نے سابقہ حکومت کو تنقید کا نشانہ بناتے ہوئے کہا کہ “ایک نااہل وزیر کی وجہ سے پی آئی اے کو 600 ملین ڈالر کا نقصان برداشت کرنا پڑا، اور یہ نقصان سابق وزیر ہوا بازی غلام سرور خان سے وصول کیا جانا چاہیے۔”
سحر کامران نے مطالبہ کیا کہ “کسی کی نااہلی کو چھپانے کی بجائے حقائق کو سامنے لایا جائے” تاکہ اداروں کی ساکھ کو مزید نقصان سے بچایا جا سکے۔
مزید پڑھیں: پی پی پی رہنما سحر کامران کا مالیاتی وزارت پر شدید تنقید، فنڈز کی تاخیر پر تشویش کا اظہار
