اسلام آباد(روشن پاکستان نیوز)انسدادِ منشیات فورس (اے این ایف) نے ملک کے مختلف شہروں میں منشیات کی اسمگلنگ کے خلاف مؤثر کارروائیاں کرتے ہوئے 7 کروڑ 28 لاکھ روپے سے زائد مالیت کی 186.280 کلو گرام منشیات برآمد کی ہیں۔ ان کارروائیوں کے دوران 6 ملزمان کو گرفتار کیا گیا ہے۔
جناح انٹرنیشنل ائیرپورٹ پر لاہور سے آسٹریلیا بھیجے جانے والے پارسل سے 4.3 کلو آئس برآمد ہوئی ہے، جبکہ لاہور میں ایک کوریئر آفس سے کرگستان جانے والے پارسل میں جوتوں کے اندر چھپائی گئی 380 گرام آئس بھی قبضے میں لی گئی۔
اسلام آباد کے فیض آباد بس ٹرمینل کے قریب ملزم کے قبضے سے 23 کلو آئس اور ایک کلو مشکوک مواد بھی برآمد کیا گیا۔ پشاور کے رنگ روڈ کے قریب 2 ملزمان سے 19.2 کلو چرس، موٹر سائیکل سوار 2 ملزمان سے 5 کلو ہیروئن اور ایک اور کارروائی میں ملزم کے بیگ سے 8.4 کلو چرس برآمد ہوئی۔
کراچی کے ہاکسبے روڈ پر واقع کمپنی کے گودام میں 2 کنٹینرز میں چھپائی گئی 105 کلو آئس اور 20 کلو ہیروئن بھی اے این ایف نے قبضے میں لے لی ہے۔
