لاہور(روشن پاکستان نیوز)وزیراعلیٰ پنجاب مریم نواز شریف نے کہا ہے لوگ کہتے ہیں کہ ریکارڈ مدت میں سڑکیں بن رہی ہیں ،منصوبوں کی تکمیل ہو رہی ہے ایسے لگتا ہے کہ جیسے جنات کام کررہے ہیں۔ 30،30 سال سے نہ بننے والی سڑکیں بن چکی ہیں۔
پنجاب بھر میں 1250 سے زائد مراکز صحت ری ویمپ کرکے منی ہسپتال میں بدل دیا، ریکارڈ ٹائم میں ہسپتالوں کی حالت بدل چکی ہے ۔ وہ راولپنڈی میں نوازشریف فلائی اوور اور جی پی او / ٹی ایم انڈر پاس کی افتتاحی تقریب سے خطاب کر رہی تھیں ۔وزیراعلیٰ نے 8 ارب 77 کروڑ روپے کے میگا پراجیکٹس اڈیالہ روڈپر نواز شریف فلائی اوور اور مال روڈ جی پی او چوک کے انڈر پاس کا باقاعدہ آغازکیا۔مریم نوازشریف نے اعلان کیا پنجاب میں پینے کے صاف پانی کے پراجیکٹ شروع کئے جائیں گے ۔ انہوں نے جنوبی پنجاب اور پوٹھوہار ریجن میں پینے کے صاف پانی کے پراجیکٹس جلد لانے اور پائپ لائنیں بچھانے کے پراجیکٹ تیارکرنے کا اعلان کیا۔ وزیراعلیٰ نے مری میں پانی کی فراہمی کا مسئلہ جلد از جلد حل کرنے اور راولپنڈی کے نالہ لئی کی تعمیر و توسیع کے پراجیکٹ کی تیاری کابھی اعلان کیا۔ وزیراعلیٰ نے خطاب کرتے ہوئے کہا راولپنڈی رنگ روڈ کو ریکارڈ ٹائم میں مکمل کریں گے ۔
پنڈی کے تمام سکولوں کی ری ویمپنگ کی جارہی ہے ، جلد مکمل کر لی جائے گی۔ انہوں نے کہا راولپنڈی شہر کی بیوٹی فکیشن کے پراجیکٹس کی خود مانیٹرنگ کررہی ہوں۔ مری سے باڑیاں پہنچنے پر پنجاب کی حدود ختم ہوتی ہے تو صفائی اور انفراسٹرکچر کا واضح فرق نظر آتا ہے ۔ ستھرا پنجاب پراجیکٹ کے تحت صوبہ بھر میں صفائی کا اچھاکام ہورہا ہے ۔ انہوں نے کہا نوازشریف فلائی اوور کی تعمیر سے پنڈی سے چکری کے سفر کا دورانیہ ایک گھنٹہ کم ہوجائے گا۔ راولپنڈی میں روڈز کی تعمیر وبحالی کے بیشتر پراجیکٹ مکمل ہوچکے ہیں۔ پنجاب بھر میں 12ہزار کلو میٹر سے زائد سڑکوں کی تعمیر ومرمت کی مثال قائم کی ہے ۔ چند ہفتوں میں پنجاب بھر میں 19 ہزار کلو میٹر سڑکوں کی تعمیر ومرمت اور بحالی کے پراجیکٹ مکمل ہوجائیں گے ۔ وزیراعلیٰ نے کہا فلائی اوور اور انڈر پاس کی ریکارڈ ٹائم میں تکمیل پر تعمیرات و مواصلات کی سٹار ٹیم، منسٹر صہیب بھرت اور سیکرٹری سہیل اشرف کو شاباش دیتی ہوں۔ دو لاکھ گاڑیاں روزانہ گزرنے کایہ منصوبہ سٹیٹ آف دی آرٹ بنایا گیا ہے ۔
مزید پڑھیں: 20 بچوں کی ہلاکت، مریم نواز کے حکم پر ایم ایس اور سی ای او ہیلتھ پاکپتن گرفتار
پراجیکٹس کی تکمیل میں تعاون پر فرنٹیئر ورکس آرگنائزیشن کا بھی شکریہ ادا کرتی ہوں۔ وزیراعلیٰ نے کہا عاشورہ/ محرم الحرام میں پوری ٹیم نے محنت اورعقیدت سے کام کیا،کئی سال بعد پاکستان میں مثالی مذہبی ہم آہنگی دیکھی گئی۔راولپنڈی شہر میں ٹریفک کی روانی کے لئے دومیگا پراجیکٹس اعلیٰ تعمیرات کے معیار کے ساتھ ریکارڈ مدت مکمل کئے گئے ہیں ۔قبل ازیں وزیراعلیٰ کی آمد پر عوام نے پھولوں کی پتیاں نچھاور کیں۔ وزیراعلیٰ نے ہاتھ ہلا کر نعروں کا جواب دیا۔ دریں اثناء مریم نواز نے لاہور سمیت پنجاب بھر میں موسلادھار بارشوں کے پیش نظر تمام اداروں کو ہائی الرٹ رہنے کی ہدایت کی ہے ۔ وزیراعلیٰ نے واسا، پی ڈی ایم اے ،لوکل گورنمنٹ، ریسکیو 1122 اور ٹریفک پولیس کو فیلڈ میں رہنے کا حکم دیا۔وزیراعلیٰ مریم نواز نے کہا عبدالستار ایدھی کو سلام پیش کرتی ہوں ان کی زندگی سکھاتی ہے اگر جذبہ صادق ہو توایک فرد بھی انسانی خدمت کر سکتا ہے ۔ عبدالستار ایدھی کی 8 ویں برسی پر پیغام میں وزیراعلیٰ نے کہا عبدالستار ایدھی پاکستان کا فخر ہیں،ان کا نام تا قیامت زندہ رہے گا۔ عبدالستار ایدھی جیسے لوگ انسانیت کی معراج اور معاشرے کی خوبصورتی ہیں۔
