اسلام آباد(روشن پاکستان نیوز) سوشل میڈیا پر ایک ویڈیو تیزی سے وائرل ہو رہی ہے جس میں ایک خاتون پنجاب پولیس کی وردی پہن کر ڈانس کرتی دکھائی دے رہی ہے۔ اس ویڈیو نے نہ صرف عوام میں بے حد غم و غصہ پیدا کیا ہے بلکہ پولیس کی عزت و وقار پر بھی سوالیہ نشان لگا دیا ہے۔
ویڈیو میں نظر آنے والی خاتون کی حرکات سے عوام کو یہ تاثر ملا ہے کہ پولیس کی وردی اور اس کے تقدس کو مذاق بنایا جا رہا ہے، جو کہ نہ صرف پولیس اہلکاروں کی محنت اور قربانیوں کی بے عزتی ہے بلکہ قانون کی عملداری کے لیے بھی نقصان دہ ہے۔
پنجاب پولیس کے آئی جی صاحب سے درخواست کی جا رہی ہے کہ وہ اس معاملے کی فوری تحقیقات کریں اور ایسی حرکتوں کی روک تھام کے لیے سخت اقدامات کریں۔ وردی کے ساتھ تعلق رکھنے والے ہر فرد کو چاہیے کہ وہ اس کی عزت کرے اور پولیس کے وقار کو بحال رکھنے میں اپنا کردار ادا کرے۔
عوامی حلقوں کا کہنا ہے کہ اگرچہ تفریح اور سماجی میڈیا پر اظہار خیال آزادی ہے، لیکن کسی بھی ادارے کی توہین ناقابل قبول ہے، خاص طور پر جب بات ہو عوام کی حفاظت اور خدمت کے لیے کام کرنے والی پولیس کی۔ یہ ویڈیو پنجاب پولیس کی شبیہہ کو نقصان پہنچانے کے علاوہ نوجوانوں میں غلط پیغام بھی دے رہی ہے۔
مزید پڑھیں: فوٹو جرنلسٹ کے وفد کی صدر سجاد حیدر کی قیادت میں گورنر پنجاب اور گورنر کے پی سے ملاقاتیں
سوشل میڈیا صارفین نے پولیس انتظامیہ سے مطالبہ کیا ہے کہ ایسی ویڈیوز کو فوری طور پر بند کیا جائے اور ذمہ دار افراد کے خلاف کارروائی کی جائے تاکہ پولیس کی عزت بحال ہو اور عوام کا ادارے پر اعتماد برقرار رہے۔
یہ بھی کہا جا رہا ہے کہ اگر وردی اور اس کی عزت میں اضافہ ممکن نہ ہو تو کم از کم ایسے مناظر اور حرکات کی اجازت تو نہ دی جائے جو پولیس کی توہین کا باعث بنیں۔ پنجاب پولیس کو چاہیے کہ وہ اپنے معیار کو بلند کرے اور ایسی غلط فہمیوں کو ختم کرنے کے لیے مثبت اقدامات اٹھائے تاکہ قانون نافذ کرنے والے ادارے کا وقار اور عزت قائم رہے۔
