اسلام آباد(روشن پاکستان نیوز) پاکستان تحریک انصاف ( پی ٹی آئی ) کے بانی کی بہن علیمہ خان نے کہا ہے کہ عمران خان کے اکاؤنٹس سے اب کسی ولاگر کی پروموشن نہیں ہوگی جب کہ جیل میں ملاقات کے دوران انہوں نے فیصل چوہدری سے پوچھا کہ تم کس طرح مجھ سے ملنے آجاتے ہو۔
اڈیالہ جیل میں پی ٹی آئی رہنماؤں کی عمران خان سے ملاقات کے بعد ان کی بہن علیمہ خان نے دیگر رہنماؤں کے ہمراہ میڈیا سے گفتگو کی۔
علیمہ خان کا کہنا تھا کہ اللہ کا شکر ہے کہ دو بہنوں، ڈاکٹر عظمیٰ اور نورین نیازی کو بانی پی ٹی آئی سے ملاقات کی اجازت دے دی گئی جب کہ ان دونوں نے عمران خان سے احتجاجاً کہا کہ آپ ان لوگوں سے نہیں ملیں گے جن کے نام فہرست میں شامل نہیں ہوں گے۔
علیمہ خان کا کہنا تھا ’عمران خان کو بتایا گیا کہ آپ سے جو لوگ ملتے ہیں وہ باتوں کو توڑ مروڑ کر پیش کرتے ہیں‘۔
ان کے مطابق بانی پی ٹی آئی کو جب بتایا گیا کہ آپ کے ’ایکس‘ اکاؤنٹ سے وی لاگرز کی تعریف کی گئی ہے جس پر عمران خان نے کہا کہ میں نے تو کسی کی تعریف نہیں کی اور نہ ہی ایسی کوئی بات کی ہے۔
علیمہ خان نے کہا کہ جو لوگ پچھلے دنوں عمران خان سے ملنے کے لیے گئے ہیں انہوں نے جھوٹ بولا ہے، ہم نے اس چیز کو روکنا ہے کہ بانی کا اکاؤنٹ مس یوز نہ ہو، ان کے ایکس اکاؤنٹ سے غلط بیانی نہیں کرنے دیں گے۔
علیمہ خان کے مطابق عمران خان نے ملاقات کے دوران واضح کیا ’کوئی مائنز اینڈ منزلز بل خیبرپختونخوا اسمبلی میں پیش نہیں ہوگا اور نہ کوئی اپیکس کمیٹی میں ان کی اجازت کے بغیر جائے گا‘۔
بانی پی ٹی آئی کا کہنا تھا کہ علی امین گنڈا پور میرے پاس ملاقات کے لیے کیوں نہیں آتے، نواز شریف کی پوری کیبنٹ ان سے ملنے اور پالیسی پوچھنے جیل چلی جاتی تھی، اور پھر لندن بھی جایا کرتی تھی۔
عمران خان نے سختی سے ہدایت کی ہے کہ کوئی بھی پالیسی ان کے بغیر منظور نہیں ہوگی اور کوئی بھی اپیکس کمیٹی میں ان کی اجازت کے بغیر نہیں جائے گا۔
بانی پی ٹی آئی نے جنید اکبر کو ہدایت کی ہے سارا فوکس تحریک پر رکھیں، لوگ اس وقت بھر پور تحریک چاہتے ہیں۔
ان کا مزید کہنا تھا کہ الیکشن کمیشن کے سامنے احتجاج کریں، انہوں نے الیکشن ٹریبونلز میں جانے کی بھی ہدایت کرتے ہوئے واضح کیا کہ کوئی ڈیل نہیں ہورہی نہ کسی سے کوئی بات ہورہی ہے۔
ایک سوال کے جواب میں انہوں نے کہا کہ بانی کی طبیعت اور صحت بالکل ٹھیک ہے، انہوں ( عمران خان ) نے خود سے متعلق بھارتی میڈیا کے پروپیگنڈا پر حیرانی کا اظہار کیا ہے۔
مزید پڑھیں: عمران خان سے جیل میں ملاقات نہ کروانے پر توہین عدالت کی درخواست خارج
علیمہ خان نے کہا کہ انڈیا کے معاملے پر مجھے حکومت کی سنجیدگی دکھائیں، حکومت انڈیا کے ساتھ تناؤ پر ڈرامے کررہی ہے۔
انہوں نے کہا کہ آج پولیس والوں نے ارکان اسمبلی کو مارا ہے کپڑے پھاڑے ہیں، یہ پولیس والے بتارہے ہیں کہ ایک منتخب ممبر کی کیا حیثیت ہے۔
