اسلام آباد (روشن پاکستان نیوز): پاکستان پیپلز پارٹی کی ممتاز رہنما اور رکن قومی اسمبلی سحر کامران نے سینیٹر تاج حیدر کی وفات پر گہرے دکھ اور افسوس کا اظہار کیا ہے۔ ایک تعزیتی پیغام میں سحر کامران نے کہا کہ سینیٹر تاج حیدر پاکستان پیپلز پارٹی کے بانی اراکین میں سے ایک تھے، جنہوں نے اپنی زندگی میں جمہوریت اور سماجی انصاف کے لیے گراں قدر خدمات انجام دیں۔
انہوں نے مزید کہا کہ تاج حیدر نہ صرف ایک بہترین سیاستدان تھے بلکہ ایک ماہر ریاضی دان، ادیب اور ڈرامہ نگار بھی تھے۔ ان کی سیاسی سرگرمیاں اور پاکستان ٹیلی ویژن کے لیے لکھے گئے ڈرامے پاکستان کے ثقافتی ورثے کا حصہ ہیں۔ ان کا سیاست میں کردار، خاص طور پر انتخابی شفافیت کے لیے جدوجہد، بے حد اہم تھا۔
سحر کامران نے کہا کہ تاج حیدر کی وفات سے ایک بڑا خلا پیدا ہوگیا ہے، اور ان کی کمی پاکستان پیپلز پارٹی کے لیے ناقابل تلافی ہے۔ انہوں نے کہا کہ سینیٹر تاج حیدر کی تعلیمی شعبے میں بھی گرانقدر خدمات تھیں، خاص طور پر شہید محترمہ بے نظیر بھٹو اکیڈمی کے ذریعے کمیونٹی کی فلاح و بہبود کے لیے ان کی محنت لائق ستائش تھی۔
مزید پڑھیں: وفاقی آئینی عدالت کا قیام ملک، نظام عدل و انصاف اور جموریت کے استحکام کے لئے ضروری ہے، سحرکامران
سحر کامران نے سینیٹر تاج حیدر کے اہل خانہ، عزیز و اقارب اور پاکستان پیپلز پارٹی کے تمام کارکنوں سے اظہار تعزیت کرتے ہوئے دعا کی کہ اللہ تعالی ان کی روح کو سکون دے اور ان کے خاندان کو یہ عظیم نقصان برداشت کرنے کی ہمت دے۔ آمین۔
