لاہور(روشن پاکستان نیوز) وزیر اعلیٰ پنجاب مریم نواز نے چاند رات اور عیدالفطر پر فول پروف سکیورٹی انتظامات کا حکم جاری کر دیا ہے۔

وزیر اعلیٰ نے چاند رات پر بازاروں میں ویمن پولیس اسکواڈ کا گشت بڑھانے کی ہدایت کرتے ہوئے کہا ہے کہ بازاروں میں خواتین اور بچوں کا تحفظ ہر صورت یقینی بنا یا جائے۔

مزید پڑھیں: اسٹاک مارکیٹ میں ملا جلا رجحان ، ڈالر کی قیمت میں معمولی کمی

وزیراعلیٰ کی ہدایت پر لاہور کے 65 تجارتی مراکز پر پولیس کی اضافی نفری تعینات کر دی گئی ہے جبکہ  بازاروں اور مارکیٹوں میں نگرانی کے لئے ڈرون کیمروں اور نائٹ ویژن دوربین کا استعمال شروع کر دیا گیا ہے۔

چاند رات پر ون ویلنگ کی روک تھام کے لئے بھی اقدامات کئے گئے ہیں ، اس حوالے سے پولیس 55 مقامات پر ناکہ بندی کرے گی ، اس کے علاوہ اے ٹی ایمز اور بینکوں کے اطراف میں 225 مقامات پر پولیس اہلکاروں کی ڈیوٹی لگا دی گئی ہے۔