اسلام آباد (روشن پاکستان نیوز) – وفاقی وزیر اطلاعات عطاءاللہ تارڑ نے نیشنل پریس کلب اسلام آباد کے نومنتخب عہدیداران کو مبارکباد دی۔ انہوں نے اظہر جتوئی کو صدر، نیئر علی کو سیکریٹری اور وقار عباسی کو سیکریٹری خزانہ منتخب ہونے پر دلی مبارکباد پیش کی اور ان کی کامیابی کے لیے نیک تمناﺅں کا اظہار کیا۔
اس موقع پر وفاقی وزیر اطلاعات عطاءاللہ تارڑ نے کہا کہ حکومت آزادی صحافت اور آزادی اظہار رائے پر مکمل یقین رکھتی ہے، اور صحافی برادری کو ملک کا اہم ستون قرار دیا۔ انہوں نے مزید کہا کہ پریس کلب صحافیوں کی مضبوط آواز ہے اور یہ ایک ایسا ادارہ ہے جو صحافیوں کے حقوق، آزادی اظہار رائے اور پیشہ ورانہ ترقی کے لئے نمایاں کردار ادا کر رہا ہے۔
عطاءاللہ تارڑ نے نومنتخب عہدیداران کی کامیابی کو صحافی برادری کے بھرپور اعتماد کا اظہار قرار دیتے ہوئے امید ظاہر کی کہ نئی قیادت صحافیوں کی فلاح و بہبود، آزادی صحافت اور قومی مفاد میں مثبت کردار ادا کرے گی۔
انہوں نے کہا کہ حکومت صحافیوں کے مسائل کے حل، ان کی پیشہ ورانہ استعداد کار میں اضافے اور آزادی صحافت کے فروغ کے لئے ہر ممکن تعاون جاری رکھے گی۔
مزید پڑھیں: افضل بٹ کے جرنلسٹ پینل نے نیشنل پریس کلب انتخابات میں بڑی کامیابی حاصل کر لی
